Hmeichhe World Cup USA an champion chiang

Canada rama Hmeichhe World Cup neih chu nimin zing khan an khel zo ta. USA tan Carli Lloyd chuan minute 13 chhung leka hat-trick siamin US hmeichhe team-in champion lai Japan an sawp a, champion thar an ni ta.

Lloyd 'show'

Kum 2011 Hmeichhe World Cup final-ah USA leh Japan an lo inkhel tawh a, hun pangngaiah goal khat ve ve khunga inhnehtawkin penalty ah Japan an chak. Kum li hnuah USA-in Japan laka phuba lakna hun ṭha an nei a, an ram mipuite beiseina an ti thlawn lo.

Inkhel ṭan aṭanga minute thumna lekah USA tan captain Lloyd-in goal a rawn khung nghal a, Japan insiamṭhat hma minute hnih hnu lekah goal khat dang a rawn khung leh nghal.

Kum 32-a upa Houston Dash midfielder hian a la tar loh zia minute 16 naah rawn tilang lehin field chanve aṭangin a goal thumna ropui takin a khung a, minute 13 chhungin hat-trick a siam fel der. Tun hmain Hmeichhe World Cup final-a hat trick siam thei an la awm ngai lo.

USA goal hnih dang hi Lauren Holiday leh Tobin Heath te khung a ni. Champion lai Japan-in Yuki Ogimi goal khat thun leh Julie Johnston own goal hmangin chhanglet mah se an tlarhnung phui loh an tuar a, 5-2 in chak zawkah USA an ṭang ta a ni.

Inkhel chhehvel

Kum 1991 leh 1999 khan USA hmeichhe team-in World Cup nomawi an lo chawi tawh a, kumin hi an vawi thum chawina niin Hmeichhe World Cup-a vawi thum champion thei hmasa ber an ni.

Minute 86 naa USA striker Alex Morgan thlak tura rawn tlan lut defender Christie Rampone kha kum 40-a upa niin Hmeichhe World Cup-a inlan thei upa ber a ni.

Kumin Hmeichhe World Cup final-a goal lut zat hi goal sarih niin Hmeichhe World Cup final-ah kha aia tam kha goal a la lut ngai lo.

2012 London Olympic football hmeichhe final-ah USA hian 2-1 in Japan hmeichhe team hi an lo hneh tawh bawk a, hemi ṭuma Japan hmeichhe team ngam loh chu nimin final-a an ngam loh tho Lloyd a ni. US tana vawi 202 lai khel tawhtu midfielder hian Olympic final-ah hian Japan lamah goal hnih a khung a ni.

Zero to hero

Japana lama hat-trick siamtu Lloyd hian kum 2011 Hmeichhe World Cup final-a Japan nen an inkhelh ṭumin penalty a pet goal lo a, niminah erawh thawnthu hlui thlak danglamin an ram champion nana player pawimawh a ni.

A hat-trick siamna goal mawi taka khungtu Lloyd chuan a goal thumna chungchang sawi langin, "Training naah vawi khat chu tiang khan ka pet goal tawh a, khatiang goal ropui kha chu khung zen zen theih a ni lo. Rim takin ka thawk a, goal ropui tak ka khung ta hi ka lawm hle," a ti.

Kum 32-a upa midfielder chuan sawi chhunzawmin, "Keimaha rinna nghat tlattu engemaw zat an awm a, ka taksa lamah harsatna tawk mah ila theihtawp chhuahin min ringtute min rinna chu chak nan ka hmang a ni. Ka team-mate te ka chhuang takzet a, vawiinah hian sulhnu ropui tak kan hnutchhiah a ni," a ti bawk.

Kum 48-a upa USA coach Jill Ellis chuan, "Kum khat liamta mai khan ka hna ka chelh ṭan ve chauh a, ka player te hnenah pawh insiamṭhat ran an mamawh thu ka hrilh. Harsatna tam tak tawkin vawiinah final an hmachhawn a, ropui takin an khel a ni. Hetiang hun ropui min tawnpuitu player leh staff te ka chhuang takzet a ni," tiin a thawhpuite a chawimawi thiam hle.

Lawmman dawngtu te:

Golden Ball (Best player)

Carli Lloyd, United States

Golden Glove (Best goalkeeper)

Hope Solo, United States

Young Player Award (Dec. 31, 1994 hnu lama piang)

Kadeisha Buchanan, Canada

Golden Boot (Top scorer)

Celia Sasic, Germany

* USA captain Llyod leh Germany star striker Sasic te hian goal ruk ve ve thun mahse Sasic-i'n game a khelh tlem zawk avangin top scorer-ah puan a ni.