Asia Cup khel tur Remsiami

India rama hockey thuneitu sang ber Hockey India chuan Women’s Asia Cup 2025 khel tur player 20 an puang a, an zingah hian Lalremsiami Hmar chu hming langsar zinga mi a ni.

Inelna hi September 5-14 chhung hian Hangzhou, China-ah khelh a ni dawn. India hi Pool B-ah Japan, Thailand leh Singapore te nen an awmkhawm a, an match hmasa ber atan Thailand an hmachhawn ang.

Women’s Asia Cup hi a pawimawh, champion tan hming ṭhatna leh sum leh pai chauh a ni dawn lo, a chungnung ber chu Women’s Hockey World Cup 2026 khel turin an tling nghal dawn a ni.

Kolasib nula Remsiami chuan, "Aisa Cup khel tur hian theihtawpin kan inbuatsaih a, player ten inrintawkna pawh kan nei ṭha. Kan khelh fuh ṭum a nih chuan ram ṭha tak tak te pawh kan hneh thei tih ka hria.

"Hmabak hlen chhuah tur tam tak kan nei a, ṭha taka kan khelh theih nan Mizo mipuite min lo ṭawngṭai pui leh tur pawhin ka sawm," tiin Vanglaini a hrilh a, Mizo nula hi midfielder atan an hmang dawn a ni.

India hian kum 2004 leh 2007 khan Asia Cup nomawi hi an lo la tawh a, tun ṭuma pool khata an awmpui Japan hi vawi thum champion tawh an nih bakah title kawl mektu an ni bawk.

India Squad:

Goalkeepers: Bansari Solanki, Bichu Devi Kharibam

Defenders: Manisha Chauhan, Udita, Jyoti, Suman Devi Thoudam, Nikki Pradhan, Ishika Chaudhary

Midfielders: Neha, Vaishnavi Vitthal Phalke, Salima Tete, Sharmila Devi, Lalremsiami, Sunelita Toppo

Forwards: Navneet Kaur, Rutaja Dadaso Pisal, Beauty Dungdung, Mumtaz Khan, Deepika, Sangita Kumari.