Point mamawh SYS FC

GIG Motors MPL12-ah SYS FC leh I Day Football finalist Saikhamkawn ten point an la hmu lo a, vawiin tlai dar 3:00 hian Lunglei club hian MPL kai thar Kanan FC an hmachhawn dawn. Chawngthansanga kaihruai Kanan hian match hmasa berah Saikhamakawn hneh mah se Aizawl West Derby-ah Dinthar an hneh loh avangin point thum chauh an la hmu.

Lalmuankima kaihruai SYS hian season liam ta khan club thar nichungin hun rei tak semifinal an beisei ngam a, an tan relegate a hlauhawm loh. Kuminah erawh an player ṭha ṭhahnem tak an chan avangin inelna ṭan hma aṭanga relegate thei zinga ngaih an ni a, match hmasa pahnihah point an hmu lo.

SYS hian match hnuhnung berah Aizawl FC an hneh lo a, I League club lakah tlarhnung tiphuiin goal an venghim ṭha. Mahse, first half tawp hma hretin rei lote chhung an muthlu a, point an hmu zo ta lo. Kanan lakah erawh goal venhim tawp a rem dawn tawh lo a, goal an nawr tel a rinawm avangin tlarhnung tih phui a harsa dawn.

Kanan hian tlarhmaah Lalthanpuia (Tepuia), Lalthanzuala (TZ-a) leh F. Lallawmkima te an nei a, SYS tlarhnung tan buaipui tham an ni dawn. Chutihrualin SYS hian midfield-ah K. Lalhmangaihkima leh Joseph Lalṭhafela te ball sem tur an dang chat thei a nih chuan tlarhnung hna a hahdam hret thei ang.

SYS hian tun inelnaah goal nga an chhuah tawh a, chutihrualin match hmasa pahniha an hmachhawnte hi I League club-te an ni a, naupang rual tan a harsa dawn. Vawiinah MPL kaithar Kanan an hmachhawn dawn a, SYS hian MPL12-a a vawi khat nan goal khung ngei an tum ang.

Tlarhma lamah Vanlalramnghaka hmuhnawm viau mah se goal hmaah a la hriam tawk lo a, goal khung turin Oliver Lalmalsawma Khiangte leh Lalruatdika te an pawimawh tel bawk ang.