Second round-ah Swiatek a lut

Iga Swiatek chuan Thawhlehni zan khan Emiliana Arango chu 6-1, 6-2 a sawp chungin US Open khelh laiah second round a lut. Seeded pahnihna hian a match dawt lehah chuan Suzan Lamens a tum leh ang.

Arthur Ashe Stadium-ah Swiatek hian inkhel a thunun hneh hle a, a khingpui service chhuhsak theihna remchang vawi ruk a hmuh zinga pali ngawt a chhawr ṭangkai thei, amah service a hloh miah lo bawk.

Grand Slam vawi ruk champion tawh Swiatek hian kum 2022 khan US Open nomawi pawh hi a lo chawi tawh a, kuminah Wimbledon champion ni chungin a inlan a, a boruak ṭhat lai a nih avangin beisei pawh a nei sang chho hle ang.