Champion lai Sinner a chak nuamsa
US Open champion lai Jannik Sinner chuan nimin zing khan Vit Kopriva chu a sawp a, nomawi a kawl lai humhim a tumna kawngah bul a ṭan fuh hle - game li chauh hloh chungin a chak tlang a ni.
Arthur Ashe Stadium, New York-a inkhelah Sinner tan hna harsa a awm lo, darkar khat leh minute 38 chhung lekin world number 89 Kopriva hi 6-1, 6-1, 6-2 in a hneh, a match lehpekah chuan Alexei Popyrin a hmachhawn ang.
Nizan leh tukin khan Novak Djokovic leh Carlos Alcaraz te an inlan ve thung a, result kan hre hman lo. US Open 2025-ah hian tunlai mipa tennis player langsar ho an inlan kim hle a ni.
Sinner a dam
US Open inbuatsaihna zinga mi Cincinnati Open final an khelh ṭumin Sinner hi a damlo, a inkhel tluan ve thei lo a ni. Chawlhkar khat chhung inenkawlna hun a nei a, tunah chuan dam pangngai takin a inkhel thei ta a ni.
Kum 24 mi Sinner chuan, "Ka taksa a dam leh thuai theih nan khan theihtawp kan chhuah a, harsatna nei loa ka khel thei hi ka lawm takzet. Flushing Meadows hian ka nunah hmun pawimawh tak a chang a, ka chhunzawm thei dawn ni pawhin a lang.
"Season tin mai hian boruak a danglam a, kumina a bul ka ṭan dan hi duhthusam a ni," a ti. A hmachhawn leh tur world number 36 Alexei Popyrin hian Emil Ruusuvuori chu straight set hmangin a lo hneh ve bawk a, awlsam taka hneh thei a ni tawh lo mai thei.
Nikum khan Sinner hian Australian Open leh US Open nomawi a chawi a, kuminah Australian Open leh Wimbledon title a la leh tawh - season khat chhunga Grand Slam hnuhnung berah hian champion leh a tum dawn, hna erawh a hautak dawn niin a lang.
Zverev a chak
Alexander Zverev chuan nimin zing khan a match hmasa ber a khel ve bawk a, seeded pathumna hian darkar hnih leh minute riat chhungin Alejandro Tabilo chu 6-2, 7-6(4), 6-4 in a hneh a, a khel ṭha thawkhat hle.
German tlangval Zverev hian US Open khelh hma khan, a vawi khat nana Grand Slam champion nih ngei a tum thu a sawi a, a bul ṭanna a fuh avangin beisei pawh a nei sang dawn - a hmabak chu Jacob Fearnley a ni ang.
Kum 28 mi Zverev chuan, "Ka khelh ṭhat ber ni a ni lo tih chu ka hria, mahse set hloh loa hnehna chan theih chuan lungawi tur a ni thung - Grand Slam a nih chuan inkhel awlsam beisei chi a ni lo," tiin a sawi.
Wimbledon an khelh ṭum khan hneh nei loin Zverev hi a tla, taksa leh rilru tih thawven nan Spain ramah a zin a, tawnhriat nei ṭha Rafael Nadal leh a coach ni ṭhin Toni Nadal te a hmu a, beiseina thar nen inelna a hmachhawn leh ta a ni.
Inkhel dang
US Open mipa inkhel dangah Lorenzo Musetti chuan service nei ṭha tak mai Giovanni Mpetshi Perricard chu 6-7 (3-7), 6-3, 6-4, 6-4 a hnehin second round a lut. Set hmasa ber chu tie break hmangin hloh mah se a hnuah erawh a chungnung ta zawk a ni.
Kazakhstan tlangval, seeded 23-an Alexander Bublik pawh a chak, a khingpui 2014 US Open champion Marin Cilic chu 6-4, 6-1, 6-4 in a hneh. Seeded 27-na Denis Shapovalov pawhin Marton Fucsovics chu 6-0, 6-4, 6-4 in a hneh ve bawk.
Croatian tlangval Cilic hian tun hmain New York khawpuiah hian hlawhtlinna a lo chang tawh a, tunah erawh kum 36 mi a nih tawh avangin a vanglai a pel tawh, match khat chauh chak pawh a harsa tawh a ni.
Tun season atan Australian Open, French Open leh Wimbledon an khel zo tawh - US Open hi major tournament zinga a hnuhnung ber a ni tawh a, player ten an ngai pawimawh; season tawp hmain ATP Finals erawh khelh tur an la nei thung.