Ashwin-a'n IPL khelh a chawlhsan

Chennai Super Kings bowler Ravichandran Ashwin chuan nimin khan IPL khelh a chawlhsan thu a puang. Ashwin chuan, "Hun danglam bik a ni a, bul ṭanna thar ka nei dawn. Thil tawpna hi thil thar bul ṭanna hun siamtu an ti a, kan tan pawh vawiin aṭangin IPL cricketer ka nihna chu a tawp ta. Chutihrualin ram dang cricket zir chianna hun a inṭan ang," tiin cricket khelh chawlhsan erawh a la tum lo.

Board of Control for Cricket in India (BCCI) danah chuan Indian cricketer tan chuan ram danga khel tur chuan international cricket khelh chawlhsan bakah IPL khelh loh a ngai. Ashwin hian ram tana khelh a chawlhsan tawh bakah IPL khelh a chawlhsan leh tak avangin khawvel hmun dangah cricket a khel chhunzawm thei ang.

Kum 38 mi Ashwin hian IPL hi 2009 aṭanga khel ṭanin match 221 a khel a, spinner ṭha ber zinga mi niin wicket 187 a la. Batting lamah pawh Ashwin hi a che chhe lo a, match 92 a inlan aṭangin 833 runs a siam a, match tina 13.01 siam ang niin a strike rate pawh 118.15 ni phain 50 runs chu match khata a siam tam ber a ni.