Ram tan pawh Havertz inkhel thei rih lo

Arsenal forward Kai Havertz chu hliam vangin a la chawl chhunzawm - Germay tan World Cup qualifier pawh a khel dawn lo. Slovenia leh Northern Ireland te a hmachhawn ve thei dawn lo tihna a ni.

Premier League season bul an ṭan nan Arsenal hian Manchester United an luhchhuah a, hemi ṭum hian Havertz hi a inhliam - kar tawpa Leeds United an hneh ṭum pawhin a inlan ve thei lo.

German football federation (DFB) director Rudi Voeller chuan, "Kai Haverz hi khup hliam vangin a chawl mek a, a nat dan hi chiang takin hre ve lo mah ila inkhel turin a la inpeih lo tih chu kan hria, zai a ngai dawm emaw ngai lo emaw pawh ni se kan nghah a ngai," a ti.

Gunners manager Mikel Arteta chuan kar hmasa khan Havertz-a hliam chungchang hi an ngaihchan thu a lo sawi tawh a, a chawlh chen tur tak pawh an sawi thei rih bik lo - kumin February khan khup hliam vang hian a lo buai tawh a, hemi ṭum hian thla thum a chawl.

North London club hian forward Eberechi Eze an lei fel tawh bakah striker Gabriel Jesus chuan traininga nei ve leh tawh a, tlarhma lamah chuan duhthlan tur a nei chho dawn, ngaiawh tur erawh chuan Jesus pawhin a ngah rih a ngai ang.

Havertz ang tho hian Arsenal captain Martin Odegaard leh Bukayo Saka te chu hliam vangin an chawl mek. Odegaard hi Norway tana inlan tur zingah koh a ni tho a, a hliam a na lo deuh niin a lang. Saka erawh England tan koh a nih a rinawm loh thung a ni.