Wolves-in Newcastle an hnar

Wolverhampton Wanderers chuan a vawi hnih nan Newcastle United an hnar leh ta - Magpies hian striker Jorgen Strand Larsen chu pound maktaduai 50-a lakluh tumin Wolves hi an lo dawr tawh a, hnar an ni.

Nimin khan Magpies hian £55mtd-in Wolves hi an dawr leh a, mahse, a vawi hnih nan an lo hnar. Wolves hian an striker hi hralh ta se, September 1 zanah transfer a tawp tawh dawn si a, a thlakna tur neih hman loh an hlau.

Newcastle hian an player pawimawh Alexander Isak an la thlem lungawi thei lo a, striker an mamawhna a sang hle. Mahse, an beisei angin striker an la thei lo a, an buai mek.

Wolves boss Vitor Pereira chuan, "Football chu football a ni a, player zawng zawngin man an nei vek a, Lionel Messi emaw Cristiano Ronaldo emaw pawh ni se, man nei vek an ni.

"Football thil thlen dan ka hrethiam a, enge thleng chu kan hria ang. Larsen hi kan player pawimawh a ni a, ka thutlukna tur chu ni se, a cham ang," a ti.

Norway international Larsen hian season hmasa khan Celta Vigo aṭangin loan-in Wolves hi a zawm a, goal 14 a khung hnuah a nghetin thla hmasa lawk khan £23mtd-in a pan.

Hei vang hian Wolves tan Larsen hralh leh nghal chi niin a lang lo a, Manchester United lakah Matheus Cunha an chân tawh bawk.

Kum 25 mi Larsen hian Thawhṭanni zan khan Magpies-in an awh chhan pholangin, League Cup-ah goal hnih a khung.

Magpies hian Brentford forward Yoane Wissa pawh lo dawr tawhin an beidawng a, Larsen lam an hawi - tunah an hnar leh ta! Anni hma hian Hugo Ekitike (Liverpool), Benjamin Sesko (Manchester United) leh Joao Pedro (Chelsea) te an lo rim tawh a, mahse, club dang an thlang vek.