India Under-23 an tlawm

AFC Under-23 Asian Cup 2026 Qualifiers khel tura inbuatsaih mek India Under-23 chuan Thawhṭanni khan friendly match-ah Iraq an hmachhawn a, entu awm phal loa an inkhelah hian 2-1 in an tlawm.

UM Arena Stadium, Kuala Lumpur, Malaysia-ah team pahnih hi inhmachhawnin, vawiinah hian Iraq nen vek hian, entu awm lo thoin friendly match hi an khel leh ang - he thu buatsaih a nih lai hian an inkhelh dar zat tur tarlan a la ni lo.

India U23 squad-ah hian Bengaluru midfielder Lalremtluanga Fanai leh Chennaiyin midfielder Lalrinliana Hnamte te an awm a, Tluangtea hian Thawhṭanni inkhelah hian bul a ṭan.

AFC U23 Asian Cup 2026 Qualifiers hi September 3-9 hian Doha-ah khelh a ni dawn a, Blue Colts hian Bahrain (September 3), a thlengtu Qatar (September 6) leh Brunei Darussalam (September 9) te group khatah an awmpui.

Group tina a sang ber chu Asian Cup U23 khel tur hian an tling dawn a, group 11 aṭanga pahnihna tiṭha zual pali an tling bawk ang.