Champions League khel lo tur Celtic

Scottish champion Celtic-in Champions League inpetkaina chance ṭha tak nei mah se, Kazakhstan club FC Kairat an ngam loh avangin UCL playoff round aṭanga pet thlakin an awm a, Champions League an khel dawn lo.

Celtic tan Kazakhstan Premier League club hi harsa loa paltlang tura ngaih ni mah se, vawi hnih an inkhelah Scottish club hian goal an khung thei lo ve ve a, 0-0 in an inhnehtawk.

Penalty hmangin Europe-a club inelna sang ber khel tur an zawng zui a, 3-2 in Celtic an tlawm - Adam Idah, Luke McCowan leh Daizen Maeda ten an hlah vek.

Celtic boss Brendan Rodgers chuan, "Tuna kan tih theih chu, football club kan nihna anga kan dinhmun inthlir a, khawi chen nge thlen kan duh? tih inzawh hi a ni," a ti a, a lawm lo hle.

Hetihlai hian Serbian club hlun Red Star Belgrade pawh an tla a, Cypriot club Pafos chu 1-1 in inhnehtawkpui mah se, inkhel pahnih belhkhawmah 3-2 in an tlawm.

Season hmasa Europa League semifinalist Bodo/Glimt chuan 2-1 in Sturm Graz ngam lo mah se, inkhel hmasa zawkah 5-0 in an lo chak tawh a, 6-2 in an tlang bawk.

FC Kairat, Pafos leh Bodo/Glimt te tan UCL an khelh hmasak ber tur vek a ni a, nizan lamah playoff match li dang khelh niin, season thara UCL khel tur chinfel a ni ang.