US tan Pulisic a inlan dawn

CONCACAF Gold Cup a khelh loh hnuah Christian Pulisic chu ram tan a inlan ve leh dawn ta - September a Turkey leh Switzerland nen friendly match an khelh hunah a inlan ang.

Kum 26 mi Pulisic hian AC Milan tana a season hnuhnung pahnihah match 100 chuang a khel, club tan a inlan tam em avangin chawlh a duh a, an ram tan match ṭhenkhat a khelh loh phah a ni.

US coach Mauricio Pochettino chuan, "Pulisic nen hian a hma pawhin kan inbe tawh, a khel thei a nih phawt chuan a tan hmun a awm reng a, inngaihtuah buai a ngai lem lo," tiin a sawi.

USA hian FIFA World Cup 2026 an thleng dawn, football inelna ropui hmachhawn tur hian team ṭha tak neih tumin hma an la mek.