Messi hoin final an lut

Lionel Messi-a goal hnih hmangin Inter Miami chuan Orlando City 3-1 in an hneh a, an phu ang ngeiin Leagues Cup final an lut - Messi leh a ṭhiante hian LA Galaxy-Seattle nen nomawi an inchuh ang.

Chase Stadium-a inkhelah, mikhual Orlando City lamin Marco Pasalic hmangin chawlhlawk hma chiahin goal an khung a, hun rei tak chhung an venghim bawk - an defender David Brekalo an hnawhchhuah hnuah erawh an tan thil a harsa.

Minute 77-naah Tadeo Allende chuan penalty a hlawh chhuak a, hliam damhlim Messi chuan si phurh sut nan a hmang. Inter Miami captain hian duhtawk mai loin Jordi Alba nen mawi taka ball an inpek hnuah goal hnihna pawh a khung.

Hun tawp dawnah Telasco Segovia chuan Inter Miami lam goal thumna a khung a, final an lut. Inter Miami hian kum 2022 khan Leagues Cup nomawi hi an lo la tawh a, kuminah Messi ho bawkin champion leh an tum dawn a ni.

Argentina captain Messi hi hliam vangin a chawl ta zauh zauh, a vanglai angin a inkhel tam tawh lo - a inlan chhunah erawh team innghahna a la ni reng a, tun hma lam la champion thei ngai lo Inter Miami chuan Messi an neih hnuah hlawhtlinna an chang chho a, tunah pawh nomawi dang chawi leh turin match khat chak an la hmabak.