Man United hmalam hun a thim

Manchester United-in Premier League-a 15-na ni chunga season an khar zawh khan Ruben Amorim chuan Old Trafford-ah club ṭantu hmaah, "Thla ruk kal ta khan, match thumah vawi hnih chakin vawi khat kan inhnehtawk a, khami zawh khan hun harsa kan hmachhawn dawn, tih ka sawi. Season chhe tak kan hmang zo a, tunah chuan ni duhawm a rawn her chhuak dawn tih ka hrilh duh che u," tiin a sawi a, mipui thawm a ring hle.

Portuguese manager hian Man United ṭantu ruhkawl awm khawmna Stretford End hmachhawnin huaisen takin thu a tiam a, mahse fourth division club nena penalty shootout an pet lai a en ngam lo. Season bul la ṭan chauh mah se European competition khel lo tur Man United-in Premier League leh FA Cup chiah khelh tur an nei tawh a, an khelh tawh chin aṭanga thlir chuan Man United hma lam a thim.

Nipui bazarah Man United-in £200mtd sengin Benjamin Sesko, Bryan Mbeumo leh Matheus Cunha te an la lut a; Sesko-a'n penalty 10-naah pet chauhin Cunha-a'n chakna goal khung theihna turah a hlah a, Mbeumo hlah vangin Man United an chak lo. Amorim-a hote hi khelmual chhungah chauh an buai lo a, khelmual pawn lamah pawh Jadon Sancho, Alejandro Garnacho, Antony leh Tyrell Malacia te chu an phu tawk aia tlawma an zuar chung pawhin an hralh thei lo.

Season liam ta aṭangin Man United a ṭha zawngin an la danglam tam lo a, tu thiam lo nge tih chu Amorim aiin club neitu zinga mi Sir Jim Ratcliffe, chief executive Omar Berrada leh technical director Jason Wilcox te chhan tur a ni ang.

Man United sporting director Dan Ashworth chuan nikum October thlaa Erik ten Hag an ban khan a thlakna atan Thomas Frank, Marco Silva leh Graham Potter te a rawt a, mahse club thuneitute lam hian Amorim an duh.

Berrada hi Portugal-ah zinin Amorim-a'n Sporting Lisbon-a season hmang zo phawt tura a ngen chungin an nghah theih loh thu a hrilh. Premier League-ah 15-naah awm mah se club thuneituten an ring tawk a, attacking player lei nan £200mtd an pe. September 1, Thawhṭanni zanah transfer hun a tawp dawn a, Amorim-a hi an thlawp zel ang em, tih chu ngaihtuah tham a ni ta.