Kanan FC-in SYS FC an hneh hram

GIG Motors MPL12-ah Kanan FC-in nimin tlai khan SYS FC an hmachhawn a, 2-1 in hnufual hman mah se Chawngthansanga substitution awmze nei hmangin 3-2 in an lehthal. Kanan hian point rukin pathumnaah an inhlang chho a, SYS erawh tun inelnaah point an la hmu lo.

RG Stadium-a inkhelah Lalthanzuala hmanga Kanan hmahruaina chu Oliver Lalmalsawma Khiangte hmangin SYS FC-in an sut a, Lunglei club hian Stain Lalṭanfela hmangin hma an hruai zui bawk. Chak lo thei dinhmuna an din hnuah Kanan tan TZ-a'n siphurh a sut a, F. Lallawmkima'n chakna goal a khung.

Kananin I Day Football-ah SYS FC an sawp tawh a, MPL-ah erawh awlsam takin an chak tawh lo. Inkhel nung ṭha tak ni mah se tihsual a langsar a, SYS defemder Immanuel Malsawmzuala'n ṭul lo takin Lawma titluin penalty a chawi a, Kanan tan TZ-a'n minute 17-naah penalty aṭangin a khung.

SYS-in minute 26-naah Oliver hmangin siphurh an sut a, Kanan tlarhnung an ti ṭha tawk lo. Oliver-a'n pet sual mah se Stain-a rawn inrawlh zarah ball per chu Oliver zawnah a kal a, a tisual nawn awh lo.

First half-ah 1-1 a ni a, second half-ah goal thum a lut. Kanan keeper V. Lalthlamuanpuia ball a man sual a, ball per chu Oliver-a zawnah a tla. Kanan keeper talbuaiin Oliver a titlu a, penalty chawiin Stain-a'n minute 60-naah chiang zetin a khung.

Kananin bench aṭangin Lalruatfela leh Lalthuthlunga te an luhtir a, player pahnih hi an lehthal theih nan an ṭangkai hle. Thlunga cross chu SYS keeper Muanpuia'n man sualin TZ-a'n ball per chu a tauh lut nghal a, minute 66-naah 2-2 a ni.

Minute 10 hnuah Lawma'n chakna goal a khung a, vei lam aṭanga Lalrochama cross chu Lawma'n ṭha zetin a tauh lut. Kananin 3-2 in hma an hruai a, team ṭha zawk an nih bawk avangin harsatna hranpa tawk tawh loin hnehna an chang.