Mourinho-a Fenerbahce an tla!

Champions League-ah Jose Mourinho enkawl Fenerbahce kan hmu dawn lo - Nilaini zan khan playoff inkhelah 1-0 in Benfica an ngam lo a, an intawn hmasakah 0-0 a an lo inhnehtawk tawh avangin Turkish club tana UCL khelh beiseina chu a tawp.

Fenerbahce hi tun season-ah an ṭang a, nipui transfer-ah ringawt pawh player pasarih an la lut tawh. Al Nassr forward Jhon Duran (loan), Fiorentina midfielder Sofyan Amrabat, Wolverhampton Wanderers wing back Nelson Semedo, Paris Saint-Germain centre back Milan Skriniar leh West Ham midfielder Edson Alvarez (loan) an lakluhte chu player langsar zual an ni.

Heti chung hian Benfica lakah Turkish club-in beisei an phak lo a, an intawn hmasakah mahni mualah khelin, 0-0 in an inhnehtawk. Second leg-ah 1-0 in an tlawm zui a, Turkish winger Kerem Aktürkoğlu chuan an ram club lakah inkhela goal awmchhun hi a khung.

Fenerbahce forward Talisca chu yellow card pahnih a hmuh avangin hnawhchhuah a ni a, Mourinho leh a nauten season tharah Champions League an khel dawn lo.

Hetihlai hian Club Brugge khelmualah Rangers chu 6-0 ngawtin an tlawm a, inkhel hmasa nena belhkhawmin 9-1 in an chak lo - Celtic chu playoff aṭang hian an lo tla tawh bawk a, season thar UCL-ah Scottish club kan hmu dawn lo tihna a ni.

Rangers right back Max Aarons chu minute riatna lekah hnawhchhuah a ni a, inkhel hmasaa 3-1 a tlawm tawh team tan player tlem zawk ni chunga thawh ngaihna a awm tawh lo.

Belgian club tan Joaquin Seys chuan goal hnih khungin, Nicolo Tresoldi, Hans Vanaken, Aleksandar Stankovic leh Christos Tzolis ten goal khat ṭheuh an khung a, Rangers lamin a chhanletna tur nei loin an tlawm.

Azerbaijan club Qarabag-in 3-2 in Ferencvaros ngam lo mah se, inkhel pahnih belhkhawmah 5-4 a chakin, UCL khel turin an inpetkai.

Ferencvaros tan Lenny Joseph chuan goal hmahruai khungin, Qarabag hian Leandro Andrade leh Abdellah Zoubir hmangin an chhanglet leh a, Barnabas Varga (penalty) leh Alex Toth ten Hungarian club tan khung ve leh mah se, 3-2 chauha chak hi first leg-a an result avangin a tawk zo lo.

Danish club F.C. Copenhagen pawhin UCL an khel dawn - Andreas Cornelius leh Youssoufa Moukoko (penalty) hmangin FC Basel chu 2-0 in an hneh a, inkhel hmasa nena belhkhawmin, 3-1 in an tlang.