Everton, Fulham & Brighton an chak

League Cup second round-ah Nilaini zan khan Manchester United an tlawm a, hetihlai hian Premier League club dang inlan erawh an chak vek thung - United mualphona belhchhahtu an ni.

Everton-in Leeds United laka tlawm chungin Premier League season bul ṭan mah se, match hnih an khelhah an chak ve ve leh tawh - Brighton & Hove Albion laka 2-0 a an chak hnuin, League Cup-ah Nilaini zan khan an inlan a, Mansfield Town chu 2-0 in an hneh.

David Moyes-a enkawl team tan Carlos Alcaraz leh Beto ten goal khat ve ve an khung a, Harrison Armstrong-a siamsak ve ve a ni. Manchester City aṭanga loan-a Everton pantu Jack Grealish-a'n goal khung lo mah se a khel ṭha takzet a, fans lawm a hlawh lehpek hle.

League One club lakah Grealish hi khelh tluantir a ni lo a, minute 60-naa lakchhuah a nihin Everton fan-te chu, 'Super Jack Grealish' tiin an au rual hial a ni.

Brighton & Hove Albion pawh an league match hmasa pahniha an chak zawh loh hnuin, Carabao Cup lamah an insiamṭha a, Championship club Oxford United chu 6-0 ngawtin an sawp.

Premier League club tana an match hmasa berah Olivier Boscagli, Stefanos Tzimas leh Tom Watson ten goal an khung nghal a, Tzimas hian goal hnih a khung hial - Brajan Gruda leh Diego Gómez ten goal khat ve ve an khung bawk.

Manchester United nena inhnehtawk hlim Fulham pawhin Bristol City laka hnehna chang turin harsatna an tawk lo a, Championship club hi 2-0 in an hneh.

Fulham goal hmasa zawk hi George Tanner-a'n an lama a tihluh palh a ni a, Raúl Jiménez chuan tun season-a a goal hmasa ber khung bawkin, Craven Cottage-ah Fulham an chak.

League Cup-ah hian English football-a league club zawng zawng an inlan vek ṭhin a, preliminary round aṭanga khelh ṭan niin, Premier League club-te chu second round aṭangin an inlan ve ṭhin.

Mahse, second round-ah pawh hian EPL club, European football khel lote chauh an inlan a, third round aṭangin EPL club, Europe-a inelna hmachhawnte an inlan ṭan ve leh ang.