Djokovic leh Alcaraz an tlang

US Open khelh laiah, champion tura rinkai Novak Djokovic leh Carlos Alcaraz te chuan hma lam an pan zel - Djokovic hian a vaiw 19 nan third round a lut a, inkhel dangah Alcaraz chuan hnehna a chang bawk.

Vawi li a champion tawhna hmunah Djokovic a mikhual lo, Serbian star hian a ṭhat dan berin la khel chhuak rih lo mah se Zachary Svajda chu 6-7(5), 6-3, 6-3, 6-1 in a hneh; a hmabak chu Cameron Norrie a ni ang.

Grand Slam vawi 24 champion tawh Djokovic hi Wimbledon khelh zawh hnu khan a chawl vang vang a, inelna lian US Open-ah a lo kir leh chauh, a match hmasa zawkah pawh tihsual a nei nual, tun ṭumah pawh hian vawi 14 lai chu unforced errors a la nei tho.

Kum 38 mi Djokovic chuan, "Zach khan a khel ṭha viau a, min nawr buai reng avangin ka tan chet a awlsam lo. Match hmasa zawk ai chuan ka khel ṭha hret a, duhthusam vek chu la ni lo mah se hmasawnna a awm kha a lawmawm.

"A chang chuan kan ṭhat dan taka khelh chhuak tur hian kan nghah ve rih a ngai ṭhin a, hetiang hun hi chu tun hma pawhin ka lo paltang fo tawh a, boruak ṭha zawk a lo thlen theih ngei pawh ka beisei," tiin a sawi.

Djokovic hian major title a la tam ber a, amah hnaih bertu Rafael Nadal (22 tiytles) chu a chawl tawh - Novak hi a vanglai pel deuh tawh mah se a la chawl ve lo, a champion belh ta lo a nih pawhin nomawi hlu bik lak tam lamah mi dang tan tluk mai theih a la ni lo.

Inkhel dangah Carlos Alcaraz tan hna hautak a awm lo - Spanish star hian Arthur Ashe Stadium-ah Mattia Bellucci chu 6-1, 6-0, 6-3 in a hneh a, a khingpui service vawi sarih a chhuhsak laiin ama service vawi khatmah a hloh lo thung a ni.

Seeded pahnihna Alcaraz chuan, "Ball hmasa ber aṭang khan tum mumal tak ka nei sa, chumi tihlawhtling tur chuan ka fimkhur hle bawk. Rilru chiai lo leh fim taka khelh chuan rah ṭha a chhuah ṭhin.

"Nikum ka khelh dan nena khaikhin chuan kuminah ka khel ṭha zawk hleah ka ngai," a ti. US Open 2022 champion Alcaraz hian third round-ah chuan Luciano Darderi a hmachhawn leh dawn a ni.

Alcaraz leh Djokovic te hi an chak tluang chho zel a nih chuan semifinal-ah an inhmachhawn thei dawn a, player ṭha pakhat zawk chuan final an lut dawn lo; chumi hma chuan hna hautak paltlang tur an la nei nual thung.