FA Cup fourth round Premier League club lian an la dam

FA Cup fourth round-ah champion lai Manchester City bakah club lian dang Liverpool, Manchester United, Arsenal, Chelsea leh Tottenham Hotspur te an la dam vek.

Tottenham Hotspur leh Arsenal ten Premier League club an hmachhawn ve ve dawn a, Spurs-in zanin dar 8:30-ah Southampton hmachhawn turin St Mary's Stadium an tlawh dawn. Arsenal-in January 26, Thawhṭanni zanah khian Dean Court-ah Bournemouth nen an inkhel bawk ang. 

Jose Mourinho kaihhruai Spurs hian league bikah match li chhung chak hmel an hmuh loh hnuah Thawhlehni zan khan an mualah Norwich City chu 2-1 in an hneh thar a, phurna thar an nei ang. Chutihrualin an khingpui tur Southampton hi January 1 khan khualmualah 1-0 in an hneh lo.

Spurs midfielder Eric Dier chuan, "Kan team boruak ṭha hi kan chakna ber zawk a ni a, tupawhin training ṭha takin kan nei vek. Result ṭha a awm loh chuan boruak hlimawm a awm thei lo a, boruak chhia tihna a ni lo. Mimal tak phei chuan kalphung thar neih hi nuam ka ti hle," tiin club chhunga boruak chhia awm ang a, an sawi chu a pawm loh thu a sawi. 

October thlaa inhliam captain Hugo Lloris a dam leh tawh a, Norwich an hneh ṭumin France international kee­per hi a inlan leh tawh bawk.

Man City-in Pathianni zan dar 6:30-ah Fulham an mikhual dawn a, FA Cup bika vawi li an inkhelhna tur chauh a ni. Pep Guardiola hote hian FA Cup match hnuhnung pasarihah chak vekin goal 30 an khung a, goal li chauh an chhuah. City chak loh hnuhnun ber chu February 2018-a Wigan 1-0 a an hneh loh kha a ni. 

Chelsea-in zanin dar 11:00 hian KC Stadium-ah Hull City an tlawh dawn a, an intawn hnuhnun berin Blues hi 4-0 in an chak. London club hian FA Cup-a Premier League club ni lo team vawi 51 an hmachhawn tawhah vawi 49 an chak a, tun ṭumah pawh chak tura rinkai zawk an ni ang.