Chamberlain-a contract titawp

Liverpool midfielder hlui Alex Oxlade-Chamberlain chu Besiktas nen an inṭha ṭhen a, Turkish club-ah hian kum khat khel turin contract la nei mah se, inhriatthiam tawnnain a contract hi tihtawp a ni.

Kum 32 mi ni ve tawh Chamberlain hian Southampton aṭanga a professional zinkawng zawh ṭanin, Arsenal-ah a hming a chher a, Gunners tan hian season ruk zet a khelh hnuah, kum 2017 khan pound maktaduai 35-in a zawm.

Liverpool-ah hian Premier League, League Cup, Champions League, UEFA Super Cup leh FIFA Club World Cup nomawi a chawi a, mahse, Anfield-ah hian vawi hnih ngawt khup hliam serious tak a tuar.

Reds tan match 146 khelin goal 18 a khung a, assist vawi 14 a nei. A tirah player pawimawh ni mah se, a khup hliam vangin ngai a awh tawh lo a, August 2023 khan Liverpool hian an chhuah zalen.

Besiktas hi kum thum atan a zawm zui a, mahse, Turkish club-ah pawh hliam vang thoin a buai. Coach Giovanni van Bronckhorst hnuaiah phei chuan a tlatlum lo a, Manchester United manager hlui Ole Gunnar Solskjaer-a'n a enkawl hnuah hmun a chang ve leh chauh.

A tawpah erawh Chamberlain a chhuak ta dawn tho a, a contract an tihtawp avang hian Besiktas hian zângnadawmna pound maktaduai 1.5 an pe a, Championship club Birmingham City nen an sawizawm mek.

Chamberlain hian Besiktas tan hian match 50 khel hmanin, goal nga a khung a, assist vawi khat a nei a, Turkish Cup-ah a champion pui.