Tla mai thei khan European Football an sawi leh si!

"Arsenal hi Premier League aṭanga inhamtan hram hram tum zinga awm thei an ni," tiin Sam Allardyce-a'n a sawi. English manager a ṭawng chhuah aṭanga ni 11 chauh a liam leh hnuah chuan Gunners hian thawnthu danglam an nei leh daih tawh.

December thlatir kha chuan Arsenal hian an league match hnuhnung 10 aṭangin vawi khat chauh hnehna an chang, table-ah 15-na dinhmun luahin Allardyce chauh ni loin midang pawhin 'relegation battle' nen an sawi zawm - thil mak a ni hran lo.

Dinhmun chhe taka an din laiin manager Arteta-a'n chhuanlam a siam lo, "Mawhpuh tur chu keimah hi ka ni a, kan inkhelh hmabak pathum hi kan hma hun thui tak hril thei tur a ni," tiin a sawi. An hmabak chu Chelsea, Brighton leh West Brom te an ni.

December 26, ruaiṭheh zan khan Chelsea an mikhual a, 3-1 a hnehin point thum hlu tak an hlawh chhuak. Blues an hneh hi tih fuh palh a nih loh zia lantir nan Brighton an hneh zui a, an chanchin tham lo taka sawitu Allardyce naute chu 4-0 zetin an sawp zui bawk.

A zawna vawi thum an chak hnuah Arteta chuan, "Engkim mai hi a dik zawngin a kal," a ti. Champions League khel phak china awm Leicester City an phak lohna chu point ruk chauh a ni a, inkhel pahnih lekah an dinhmun danglam hlawk thei a ni der tawh.

Arsenal defender hlui Martin Keown chuan, "Engvangin nge European football an beisei theih loh ang?," tiin zawhna a zawt a, a club hlui chu an harh thar a nih phawt chuan table chunglama awm turin an ṭhat tawk thu a sawi.

Pierre-Emerick Aubameyang ke a hmui rih lo a, captain goal khung a chawl hi buaina tham an ni. Gunners buaina su kiang turin Alexandre Lacazette a rawn ding chhuak. French striker hian an match hnuhnung pathumah hian goal a khung vek.

Lacazette bakah hian Bukayo Saka leh Kieran Tierney te an langsar a, tlarhnungah hrileng kai vangin Gabriel inlan thei lo mah se Pablo Mari leh Rob Holding an inkawp fuh - sawi hmaih thiang lo chu rawlthar Emile Smith Rowe a ni.

English midfielder Smith Rowe hi kum 20 chauh la ni mah se a puitling chho dawn niin a lang. Khingpuite goal bulah ball a keng ngam a, a che rangin club tan a theihna zawng zawng a hlan tih a lang bawk - inkhelh châka tuihal a nih miau avangin fans lung a ti awi viau.

Gunners striker hlui Ian Wright chuan, "Inrintawkna an mamawh, chu an mamawh tak chu rawlthar ṭhenkhat hian an nei. Hlauh nei loa an khel a nih chuan club lian dang elphak tur pawhin an ṭha tawk, tun hnaia hnehna an chan zawn hian thil tam tak a thlakthleng ang," a ti.

Chelsea aṭangin Willian an la a, Brazilian winger hi a tir lamah khel ṭha mah se beisei a phak lo chhunzawm. Hlawh hnem Mesut Ozil chu chhawr loh langsar ber a ni, beiseina sang tak nena an lakluh Thomas Partey chu hliam vangin a chawl mek bawk.

Arteta-a'n thalsik bazar an hman chhung hian player ṭhenkhat chhuahtir an tum thu a sawi a, defender William Saliba leh Sead Kolasinac te chu tun season chhung atan loan hmanga chhuahtir an ni tawh - midang pawhin an zui a rinawm.

German international hlui Ozil hi Turkish club lamah kal tur anga sawi a awm, chutih rualin Major League Soccer club DC United nen an sawi zawm bawk. Real Madrid midfielder hlui hian tun hma lama a sawi tawh angin Gunners tana a contract hi a hmang zo mai thei bawk.

Spanish manager Arteta tan team boruak siamṭha zual tur chuan 'neuh neuh nei player' te a chinfel a ngai, tlarhma lama danglamna a thlen ang hian a chawmtu tur midfield pawh a siksawi chho tura ngaih a ni.

Arsenal-in player an mamawh ber eng nge ni? tiin zawt ta ila, a tam berin midfielder themthiam tiin an chhan a rinawm. Chutiang player ṭha bik lei tur chuan sum a ngai hnem a, chumai bakah Gunners tana khel chak player an hmuh fuh tel a ngai bawk.

Tun dinhmuna an sawi zawm langsar ber chu Norwich City duhlai Emiliano Buendia a ni. Khawthlang media lamin an tarlan dan chuan Argentine midfielder hi pound maktaduai 40 man vel zet tur a ni dawn a, hrileng vanga sum harsat laia theh chhuah atan chuan a tam tham hle.

Mahse Arsenal lamin an mamawh lakluh dan kawng an ngaihtuah. Pawisa bakah an player pek tel an hreh lo nia sawi a ni a, player kal tel thei zingah Joe Willock leh Reiss Nelson te chu Championship hmahruaitu lama kaltir an hreh lo niin an sawi.

Bazar lai a nih avangin thuthang a tam. Real Madrid leh Paris Saint Germain lama khel tam tawk lo Isco leh Julian Draxler te chu North London club nen hian sawi zawm an ni bawk. Anni pahnih hi an la a nih pawhin loan hmanga lak tur a ni ang.

- Alexandre Lacazette-a'n match hnuhnung pathumah goal li a khung. French forward Laca hi Olivier Giroud aia Gunners-in an duh zawk kha a ni a, nikum September 28-a Liverpool laka goal a khung hnuah reh vang vang mah se a theihna a pholang leh ta.

- Kum 19 mi Gabriel Martinelli hian match 17-ah chauh inkhel bul a la ṭan, kum 19 mi Bukayo Saka-a'n a hun tam zawk wing back-ah a hmang hman, kum 20 mi Emile Smith Rowe-a'n match riat chiah bul a la ṭan. Chuti chung chuan Arsenal rawlthar duhawm pathum hian season liam ta ṭantirh aṭang khan goal 20 leh assist 28 an nei tawh a ni.

- Tun hnaia Arsenal chet ṭhat chhanah Smith Rowe a ṭangkai hle. Gunners rawlthar duhawm hian Rapid Wein laka a pet goal bakah Molde, Dundalk, Chelsea leh West Brom an khelh ṭumin assist a nei a ni.

- Arsenal hian Premier League-a Manchester United an hneh hnuah match sarih chhung chak hmel an hmu lo a, vawi nga lai an chak lo. Tunah erawh Gunners hi vawi thum a zawnin an chak leh tawh a, Premier League-ah pawh point 23 hmuin palinaa awm Tottenham point ruk chauhin an pha tawh lo.