An ramah Verstappen a tlan dawn

Formula 1 nipui chawlh a zo a, season chawhnu lam an ṭan leh tawh dawn - Pathianni zan dar 6:30 hian Circuit Zandvoort-ah Dutch Grand Prix an tlan dawn, intlansiak hmuhnawm a nih ngei a rinawm.

Season hmasa Dutch Grand Prix-ah khan McLaren driver Lando Norris chu pakhatna a ni a, a hnungah Max Verstappen a thleng. Tualchhung tlangval Verstappen hian kuminah hnehna chan ngei a tum ruh hle.

World champion vawi li ni tawh Verstappen chuan, "Season chawhnu lam kan hmang ṭan dawn a ni a, inelna a awlsam dawn lo hle. Mahse, a tawp thlengin kan bei dawn a, a laklawh laia tawpsan chi kan ni lo," tiin a sawi.

Red Bull car khalhtu Verstappen hian driver championship hmahruaitu Oscar Piastri chu point 97 ngawtin a phak lo mek, an inthlauhna hi intlansiak vawi lia hnehna chan ang deuhthaw a ni. Season tawp hmain inelna vawi 10 an la nei ang.

Kum 27 mi Verstappen hian a zawnin season li chhung chu F1 nomawi a chawi thei, season hmasa chawhnu lam aṭang erawh kha chuan tun hma lam a phak lo hle - tunah chuan a nomawi kawl lai humhim tur chuan hna a hautak tawh dawn.