Hmasawn ka la ngai - Sinner

Grand Slam khelhna chi khat hard court bikah a zawnin vawi 23 a chak tawh a, kaltluang viau mah se Jannik Sinner chuan a khelh danah hmasawnna tur a la tam tih a sawi - US Open nomawi a kawl lai humhim ngei a tum.

Mipa tennis world number 1 Sinner hian Ningani zan khan world number 36 Alexei Popyrin chu 6-3, 6-2, 6-2 in a hneh, hnehna chang tur hian darkar hnih chuang deuh hun a hmang.

Grand Slam (hard court bik) ah chuan kum 2023 US Open-ah khan Sinner hian Alexander Zverev a hneh lo, a hnu lamah chuan hneh loh a la tawng leh lo, season hmasa pawh khan New York khawpuiah hian a champion.

Wimbledon champion Sinner chuan, "Hnehna chu ka chang ngei mai a, mahse ka khelh danah khan siamṭhat ngai lai tam tak a awm. A bik takin service kha siamṭhat a ngai nasa hle.

"Vanneih thlak takin ka khingpui service kha ka vaw let ṭha thei hle, service ṭha zawk ka nei thei a nih erawh chuan sang tak thleng tur pawhin beiseina ka nei," tiin a sawi, a match lehpekah chuan seeded 27-na Denis Shapovalov a hmachhawn leh ang.

Second round inkhel dangah Alexander Zverev pawh a chak - German tlangval hian Jacob Fearnley chu 6-4, 6-4, 6-4 a hnehin third round a inhlangkai ve bawk a, a vawi khat nana Grand Slam champion nih a tumna kawng a la dik zel.

Zverev hmachhawn leh tur chu Felix Auger-Aliassime a ni dawn - Canadian star hian inkhel dangah Roman Safiullin chu 6-1, 7-6 (4), 7-6 (5) in a lo hneh ve thung a, third round an inkhel tur hi a hmuhnawm ang.

Seeded pathumna Zverev chuan, "Auger-Aliassime khelh dan hi hriatthiam harsa tak mai a ni a, a khelh fuh ni chuan a ṭha ber pawh hneh thei tur a ni, a khelh ṭhat ber ni ka tawn loh hram ka beisei," tiin a sawi.