Zaninah Atletico & Real - Pathianni zanah Barca
La Liga pawh khelh chhunzawm ve zel a ni a, zaninah Madrid khaw club pahnih, dinhmun inang lo tak an inlan dawn - Atletico Madrid chuan zan dar 8:30 hian Alaves an lenchilh dawn a, Real Madrid chuan zan dar 1:00-ah Real Mallorca an mikhual thung ang.
Atletico Madrid-in nipui transfer-ah sum an hmang hnem viau chungin beisei angin season bul an ṭan lo a, match hnih khelh aṭangin point khat chiah an la nei - zaninah chuan chak an beisei ang.
Xabi Alonso hnuaiah Real-in match hnih khel tawhin an la chak ve ve thung a, zanin dar 1:00 hian Real Mallorca an mikhual thung dawn. Real ang thoa match hnih khelha la chak ve ve Barcelona chu Pathianni zan dar 1:00-ah an inlan ve dawn chauh a, Rayo Vallecano an lenchilh ang.
Atletico beiseina
Diego Simeone enkawl Atletico-in kum 2021-a league nomawi an chawi hnuah champion-na an nei leh tawh lo a, Barca leh Real an el miau avangin an tan a harsa - hei hi hre ranin nipuiah squad an insiksawi a, loan nena chhiar telin player 11 ngawt an chhuahtir!
Hetihrual hian player 10 an la lut thung a, beisei ang erawhin season bul an ṭan lo. Espanyol lakah 2-1 in an tlawm nghal a, anmahni mualah ngei Elche chu 1-1 in an inhnehtawkpui - team pahnih hi an hneh tura ngaih ve ve a ni a, zaninah tlawm a thiang tawh lo ang.
Simeone chuan, "Team kan insiamrem mek a, a nihna takah chuan bul kan ṭan ṭhat hi ka beisei lo sa a, hmasawnna tur kan la ngah. Espanyol aṭangin Elche-ah chuan hma kan sawn hret tawh. Beisei ang result nei rih lo mah ila, hma kan sawn a, kan dawh theih a ngai," a ti.
Hello Real
Real-in coach thar Xabi Alonso hnuaia an khelh avangin ngaihven an hlawh a, Spanish coach hian Club World Cup aṭang tawhin player siksawi a hreh lo tih a tarlang tawh - Carlo Ancelotti hnuaia vawk lal len Vinicius Jr pawh bench-ah a dah zeuh zeuh!
La Liga an match hnuhnung berah pawh Vini hi bench-ah dah a ni a, mahse, a luh hnuah assist a neih bakah goal a khung. Mahse, Brazilian forward hian contract thar a ziak duh lo mek a, club nen neuh neuh an ngah rih hle.
Alonso-a'n bench-ah a dah nawn ang em, tih chu zawhna awm a ni a, zaninah bul a ṭan lo leh a nih chuan thawm a awm hat ang. Kylian Mbappé erawh a changtupa a nih chhunzawm zel a, match hnihah goal thum a khung leh tawh - zaninah pawh bul a ṭan a rinawm.
Barca inlan hun
Inrinni zana Real result hre sain Barca an inlan dawn a, tuna a lan dan chuan club pahnih hi tun season-a inel leh ber tur an ni - season hman zawh takah khan Catalan club hi domestic treble champion an ni.
Mahse, Hansi Flick-a'n tualchhung football nomawiah chauh lawmna a hmu lo a, Champions League a duh tel. Hei vang hian Barca an ṭang a, sum nei vak lo chungin Marcus Rashford chu Manchester United aṭangin loan-in an hawh a, Espanyol keeper Joan García chu euro maktaduai 25-in an lei bawk.
Catalan club hi inlei belh miah lo pawh ni se, an ṭha tawk a, chu chu an match hmasa pahnih result-in a hrilhfiah. Real Mallorca (3-0) an hneh hnuah, Levante (3-2) an hneh a, Levante laka goal hnih an chhuah avang erawh chuan inenfiah an mamawh.