Europe-a club hmasawn ber AC Milan

Football analyst lar Gracenote chuan European football-a club ranking thar ber an tichhuak a,  Euro Club Index-ah hian AC Milan chu team hmasawn ber an ni. 

Thla 12 liam ta chhunga European football team hmasawn ber AC Milan hian season duhawm tak an hmang mek - tun season Serie A league match 15 an khelh tawhah tlawm an la nei lo a, hmahruaitu an ni - nizan khan Juventus nen an inkhel a, an result kan hre hman lo thung. 

European champion vawi sarih ni thei khawpa club ropui AC Milan hi rei tak an tluksawp hnuah tun hnaiah an insiamthar leh mek a, 2010-11 season hnua a vawi khat nan Serie A champion nih an beisei leh mek. 

AC Milan dawta European football team hmasawn erawh hriat lar loh Bodo/Glimt an ni a, Norwegian champion dawt chiahah hian treble champion Bayern Munich an awm. 

Euro Club Index thar berah hian AC Milan hi 20-naah an kai chho a, January 2020-ah kha chuan 47-na an ni - hei vang hian hmasawn ber an ni a, point 500 chuang zet an hmuh belh!

AC Milan hi he thu buatsaih thleng hian tun season European top five league-a tlawm la nei lo awmchhun an ni a, nizana Juventus nen an inkhel result-in hei erawh a thlak danglam leh thei thung ang. 

Gracenote-a head of sport analysis Simon Gleave chuan, "Euro Club Index hi European football-a team ṭha ber, hmasawn ber leh tlahniam ber teh nan hman a ni.

"AC Milan, Bodo/Glimt leh Bayern Munich-te hi kum liam ta chhunga an hmasawnna avangin team hmasawn zual pathum an ni," a ti. 

Euro Club Index hian season li liam ta chhunga tualchhung leh European football-a club-te chet dan chu teh nan a hmang a, ECI hrim hrima sang ber chu Bayern Munich an ni. 

Bayern hian season hmasa khan Bundesliga, German Cup leh Champions League nomawi an chawi vek a, he dinhmun luah hi an phu hle. 

Premier League club Manchester City chu pahnihnaah an awm a, season hmasaa English top flight football-a champion Liverpool chu pathumna an ni a, Barcelona leh Real Madrid-ten an dawt. 

English club zingah City leh Reds tih loh top ten-a lang awmchhun chu Manchester United an ni a, Sir Alex Ferguson-a hunlaia club ropui ṭhin hian 10-na dinhmun an luah. 

Nipui transfer-a pound maktaduai 200 chuang sengtu Chelsea chu 13-naah an awm a, tun hnaiah result an neih ṭhat hleihtheih loh avangin top ten-a an lang lo hi thil mak a ni hran lo. 

Chelsea hnuai chiahah an hmelma kumhlun Tottenham Hotspur an awm a, Jose Mourinho enkawlna hnuaiah Spurs hian hmun khatin hma an sawn - Southampton chu English club hmasawn ber niin 37-na an ni phak. 

Tluk leh din fawm ve reng Arsenal chu 17-naah an lang phak hram a, English club dang zingah top 20-a lang phak an awm lo - Gunners hi January, 2020-a an dinhmun ngai chiahah an awm.

Scottish club Rangers hming lam loh a thiang lo - Steven Gerrard-a'n June 2018-a a enkawl ṭan khan he club hi 282-na vel daih an ni a, tuna ranking chhuak thar berah erawh 50-na an ni phak.