Magpies-ah Woltemade a lut dawn

Newcastle United-in nipui transfer-a striker lakluh an tumna chu a hlawhtling ve dawn ta niin a lang a, VfB Stuttgart aṭangin Nick Woltemade an la lut dawn - he thuziak i chhiar meuh chuan an inla lut fel tawh hial mai thei.

Woltemade-a man zat tak hi tarlan awm lo mah se, club record a ni dawn nia sawi a ni a, chuti a nih chuan pound maktaduai 60 chu a chuang dawn tihna a ni.

Newcastle United player man to ber record chelhtu hi Alexander Isak a ni a, Liverpool-in lakluh tuma an hel mek striker hi kum thum liam ta khan Newcastle hian £63mtd-in an la lut.

Magpies boss Eddie Howe chuan, "Tun dinhmunah chuan inbiakna a kaltluang rih hle a, engkim tihchian a nih hma chu huaisen taka thil lo sawi ngawt theih a ni lo. Mahse, kan tihfel vat erawh ka beisei," a ti.

Kum 23 mi Woltemade hi Germany international niin, ram tan match hnih chu a inlan ve tawh a, Werder Bremen aṭanga inzir chhuak a ni. Season hmasa khan VfB Stuttgart a zawm a, hetah hian a hming a chher.

Season hman zawh takah khan inelna hrang hrangah match 33 khelin goal 17 ngawt a khung a, assist vawi thum a nei. Tun season-ah match thum khel tawhin, goal khat a khung leh der tawh bawk.

Magpies-in Woltemade an chan dawn takah chuan Isak-a tan Liverpool zawm turin kawng a inhawng zau sawt tura ngaih a ni a, Reds-in £110mtd-a an dawrna chu Newcastle hian an lo hnar tawh.

Mahse, Newcastle manager Howe chuan, "Hma hun chiang taka sawi thiam a harsa. Mahse, kei chuan khelmual pawn lama thil thleng, thuneihna ka neih lohnaah inrawlh ka tum lo.

"Thil hi a nih dan turin kal se, a thlen dan a zirin kei chuan hma ka la leh mai ang," a ti a, a squad neih ang hmasawn pui tura theihtawp chhuah chu a tih tur a nih thu a sawi - zanin dar 10:00-ah league match khel turin Leeds United an lenchilh ang.

Newcastle tan thaw ven khatin a veng ang tih a chiang. Woltemade la lut turin inremna an neih hma hian striker panga ngawt an lo dawr hlawhchham tawh!

Woltemade hma lawk hian Wolverhampton Wanderers striker Jorgen Strand Larsen chu £55mtd-a lakluh tumin Wolves an dawr a, hnar an ni. Brentford forward Yoane Wissa lakluh an tumna kawngah an lo hlawhchham ṭhak tawh bawk.

Anni pahnih hma hian Hugo Ekitike (Liverpool), Benjamin Sesko (Manchester United) leh Joao Pedro (Chelsea) te an lo rim tawh a, mahse, club dang an thlang vek.