Kawng dik zawhtu Swiatek

Iga Swiatek chuan US Open champion nih tumin kawng dik a zawh zel - Ningani zan khan Swaitek hian Suzan Lamens chu 6-1, 4-6, 6-4 a hnehin third round a lut a, hnehna chang tur hian darkar hnih leh minute ruk hun a hmang.

Arthur Ashe Stadium-ah Swiatek hi awlsam takin a chak mai bik lo, a service vawi li ngawt a hloh ve avangin a tan hna a hautak. A khingpui service vawi ruk a laksak theih avang erawh chuan a tlang zawkah a ṭang ta tho.

Kum 24 mi Swiatek chuan, "Tihsual ka nei tam hle a, inkhel awlsam lo tak chu a ni. Inkhel thunun theihna remchang ka neih kha ka hmang ṭangkai thei lo tlat ṭhin a, vannei taka ka tlang hi a lawmawm," a ti.

Swiatek hian a match lehpekah chuan Anna Kalinskaya a hmachhawn ang. Russian star Kalinskaya hi seeded 29-na a nih phak avangin awlsam taka paltlang theih a ni lo ang.