Chivu lakah beisei an nei sang

Inter Milan thuneitute chuan an coach thar Cristian Chivu lakah beisei an nei sang hle a, season hmasa lama an hloh tak Serie A nomawi pawh San Siro-ah hawn kir leh theih ngei an inbeisei.

Coach thar Chivu enkawlna hnuaiah Inter hian an match hmasa berah Torino chu 5-0 in an sawp - Pathianni zan dar 12:15 hian Udinese an mikhual zui leh dawn a, chumi hnua an hmachhawn tur chu Juventus a ni ang.

Inter Milan vice president Javier Zanetti chuan, "Coach thar kan nei a ni satliah lo, beiseina leh phurna thar tam tak an nei bawk a, thatho em em chungin season bul kan ṭan. Season hmasa lama kan la hlen chhuah chiah lohte pawh hlen chhuah theih kan inring.

"Serie A chauh a ni dawn lo, Champions League-ah pawh final te kan khel, hmasawnna duhawm tak a ni. Mahse, a hmawr kan la bawk ṭha tawk lo deuh, coach thar enkawlna hnuaiah hian boruak ṭha tak nen nomawi kan chawi theih kan beisei," a ti.

Inter hian season hmasa khan Serie A-ah Napoli an tluk lo. Antonio Conte enkawl Naples club hian an squad an thuam chhah lehzual ve bawk a, league champion nih tuma inum boruak a dang dawn hle.