Kimmich khelhna turah buaina a awm lo - Kompany

Bayern Munich manager Vincent Kompany chuan a player ṭha Joshua Kimmich khelhna hmun turah buaina a awm lo tih a sawi a, Germany tana an chhawr dan chuan nghawng a nei lem lo tih a sawi bawk.

Tun hmain Germany team manager Hansi Flick leh Joachim Low te chuan Kimmich hi right back atan an hmang fo a, tuna manager ṭang lai Julian Nagelsmann chuan central midfielder atan a hmang thung - mamawh hunah chuang tlarhnungah leh ball sem turin a hman theih.

German rama football inelna an ṭan chho a, Bayern Munich hian German Cup an khelhna hmasaah chuan Kimmich hi midfieder atan hman a ni a, inkhelh bakah Kompany hian Kimmich a chhawr zui zel dan tur zawhna a dawng nual.

Bavarians manager Kompany chuan, "Langtlang takin ka sawi ang, a nihna takah chuan ram tana an inkhel hi ka en mumal lo. Ka ngaihpawimawh zawk chu club tana training kan neih laiin engtiangin nge an chet tih hi a ni zawk.

"Kan khingpui tur a zirin kan khelh dan kan tidanglam fo, chutiang hunah chuan player theihna nei sang leh che danglam theite an pawimawh zual ṭhin, sawi lawk vek theih ni lo mah se Kimmich khelhna turah chuan buaina tur a awm lo," tiin a sawi.

German champion hian zanin dar 10:00 hian Bundesliga match khel turin Augsburg an lenchilh ang.