Mourinho leh Spurs tan nomawi rim a nam

Jose Mourinho a tel tawh chuan nomawi a hnai ṭhin. Tottenham Hotspur pawhin Mauricio Pochettino bana Portuguese manager an lakluh chhan chu nomawi a ni a, Spurs-in an tum ram an hnaih zel.

Thawhlehni zan khan Spurs-in Championship club Brentford 2-0 a hnehin League Cup final an lut a, nomawi chawi turin match khat chiah chak a ngai tawh. London club tan hian Moussa Sissoko-a'n minute 12-naah goal hmahruai a khung a, Son Heung-min-a'n minute 70-naah chak nemnghehna goal a khung.

Final hi April 25, Pathianniah khelh tur a ni a, Spurs hian nizana Manchester United leh Manchester City inkhela chak zawk an hmachhawn ang.

Tottenham tan Harry Kane leh Son ten bul an ṭan a, Jose Mourinho-a'n Championship club hmachhawn mah se inelna a la thutak tih a hriat. Chutihrualin Brentford hi dah hniam ngawt theih an ni lo.

Brentford hian semifinal thleng tur hian Premier League club pali - Southampton, West Bromwich Albion, Fulham leh Newcastle United te an hneh tawh. Bees (Brentford sawina) hian tun season-a goal 16 khung tawh Ivan Toney hoin bul an ṭan.

Amaherawhchu team ṭha zawk danglamna a lang a, Spanish wing back ball pet thiam Sergio Reguilon-a cross ṭha zet chu Moussa Sissoko-a'n goal kilah a tauh lut. Spurs passing a mawi a, South Korean forward Son-a'n vawi tam Brentford tlarhnung a tihbuai hnuah goal a khung.

Son hian Tanguy Ndombele through ball chu um lutin Asian tlangval hian a tlan chakna hmangin Brentford tlarhnung a tlan pel a, chiang takin a pet goal. Spurs hi awlsam takin an chak bik lo, 1-0 a nih laiin Burnley tan Toney-a'n  goal khungah a inngai. Mahse VAR hmanga a en let a nih hnuah English striker Toney hian goal a khung hmain a khup a offside hman avangin pawmsak a ni lo.

Jose Mourinho-a'n club langsar FC Porto, Chelsea, Inter Milan leh Real Madrid te an ram league-ah a champion pui vek a, Italian club phei chu a treble champion pui hial. Chu chauh ni loin Blues phei chu a enkawl hmasak leh hnuhnung zawkah a champion pui ve ve.

Manchester United-ah Mourinho hian league nomawi a chawipui loh avangin sawisel a hlawh a, amaherawhchu a hlawhchhamna club-ah hian League Cup leh Europa League nomawi a chawi tho. Spurs-ah pawh nomawi chawi ṭhin manager hian chawi leh ngei a tum.

Mourinho chuan, "Champion rilru kan put leh put loh hi ka sawi thei lo a, mahse chak duhna thinlung kan nei tih chu ka hre thei a ni. Ka sawi theih chu kan rilru a ngil a, inelna kan la thutak a, kan khingpui te zah a, hmasawn zel kan tum," tiin a sawi.

Nomawi an duhzia sawi chhunzawmin Mourinho chuan, "Final-ah hian Wembley hi ruak lo se ka duh a, a ruak ta a nih pawhin final kan thleng hrim hrim hi ka lawm. Final khelh nan thla thum daih a la awm a, inkhel danga kan rilru kan pek phawt a ṭul. FA Cup, Premier League, Europa League te khelh tur a awm. Mahse April a rawn thlen chuan nomawi chawi turin kan inpeih tur a ni," tiin a sawi.

*Tottenham-in a vawi kua nan League Cup final an lut a, Liverpool (12) chiah final luh tamah an tluk lo.

*Spurs hi vawi li an champion tawh a, anni aia nomawi chawi tam chu Liverpool (8), Manchester City (7), Aston Villa (5), Manchester United (4) leh Chelsea (5) te an ni.

*Tottenham-in nomawi lian tham an chawi hnuhnun ber chu kum 2008 kha a ni a, League Cup-ah Chelsea hnehin an champion.

*Jose Mourinho hi League Cup-a club hrang hlak pathum final luhpui thei pathumna a ni. Portuguese manager hian Spurs hma hian Chelsea leh Manchester United final a luhpui a, Ron Atkinson (Manchester United, Sheffield Wednesday, Aston Villa) leh Ron Saunders (Norwich, Manchester City, Aston Villa) te record a nih rual.

*Moussa Sissoko-a'n December 2019 khan Premier League-ah Burnley lamah a khung a, hemi hnua Spurs tana a khung leh hmasak ber chu tun ṭuma Brentford lama a khung hi a ni.

*Sergio Reguilon-a'n Spurs tan inelna hrang hrangah asssist vawi li a nei tawh a, Tottenham tan Harry Kane (14) leh Son Heung-min (8) te chauh a tluk lo.