Didika'n Real Kashmir a zawm

Mizo footballer lar Lalrindika Ralte chuan East Bengal chhuahsanin Real Kashmir a zawm a, season khat chhung khel turin contract a ziak. 

East Bengal hian season ṭan dawna ISL squad an puanah Didika an telh lo a, mahse, season khat cham turin contract-a la nei - Kolkata club chuan contract hi chhuanlamin Didika an chhuah duh lawk lo a, January transfer window hawn a nih hunah ISL squad atan an mamawh theih tur thu an hrilh. 

Mahse, season ṭantira Mohammedan Sporting Club sawmna hnar tawhtu Didika'n nghah reng a thei tawh lo a, All India Football Federation (AIFF) lamah a zualko. AIFF lamin Didika hi chhuah phalna an pe a, East Bengal hian a contract angin Lunglei tlangval hi hlawh an pe vek ang a, Real Kashmir lamin an pe bawk ang. 

Didika chuan, "Footballer tan chuan nghah reng kha thil harsa a nih avangin East Bengal ka nghak thei ta lo. AIFF lamin min puih hnuin December 24 khan Real Kashmir zawm turin Kolkata ka pan zui a, Covid-19 vangin January 8 vel thleng chu ka la inkhunghrang ang," tiin Vanglaini a hrilh. 

I League club Real Kashmir hian tun season-a an league match hmasa ber chu January 10, tlai dar 2:00-ah an khel dawn a, Trau FC an hmachhawn ang.