WTA-in kal dan tur an puang

Hmeichhe tennis thuneitu sang Women's Tennis Association chuan tun season an hman dan tur an ruahman a, kum chanve chhunga inelna awm thei tur an tarlang - season chawhnu lam erawh ngaihtuah ṭhat leh tur a ni dawn.

WTA season thar hi vawiin aṭangin Abu Dhabi-ah ṭan a ni dawn. Grand Slam pali zingah Australian Open, French Open leh Wimbledon khelh hun tur tarlan a ni a, US Open erawh an la sawi thei lo.

Season hmasa khan hrileng vangin tennis inelna chu nasa takin a buai. French Open khelh hun an sawn a, Indopui II-na hnua a vawi khat nan Wimbledon an khel lo hial - US Open chu a hmuna entu awm loin an khelh a ngai bawk.

February 8 aṭangin Australian Open an khel dawn a, French Open chu Paris khawpuiah May 23 aṭanga khelh a ni dawn bawk. All England Club chuan June 28 aṭangin Wimbledon buatsaih tura ngaih an ni bawk ang.

Grand Slam bakah hian inelna ngaihhlut WTA 1000 Master khelh tur a awm dawn. Dubai leh Miami Masters chu March thlaah an khel ang, Madrid Masters (April) leh Rome Open (May) te pawh player langsar inlanna tur a ni dawn.

Inelna dang WTA 500 events leh April 12 aṭanga khelh tur - ram leh ram inelna Fed Cup te pawh a langsar zinga mi an ni. Tun dinhmuna a hun sawi lawk theih loh zingah Tokyo Olympic leh US Open te chu a langsar an ni bawk.