Zo Clasico-a chak Chanmari an hrem

GIG Motors MPL12-ah Chanmari FC-in an elpui Dinthar FC 2-1 in hneh mah se MPL dan an bawhchhiat avangin Rs 4,000 chawitir an ni.

MPL12 Handbook-a Section I : Disciplinary hnuaiah team hrem theihna dan a awm a; chutah chuan, "Club khata player leh team official-ten match khatah yellow card paruk (6) emaw a aia tam emaw an chawi a nih chuan club-in Rs 4,000 an chawi ang. He fine hi final whistle aṭanga darkar 48 chhungin an pe tur a ni," tiin a inziak.

Chanmari hian Dinthar an hneh ṭum hian player paruk Johny Lalremruata, Laltluangliana, Lalruatsanga, F. Malsawmtluanga, Aron Vanlalrinchhana leh Lalpekhlua ten yellow card hi an hmu. An pawisa chawi hi security deposit aṭanga lak a ni a, I League club hian pawisa hi an chawi tawh a ni.

MPL12 hi September 4, Ninganiah chhunzawm a ni dawn a, Chanmari hian Kanan FC an hmachhawn dawn. Inelnaah I League club pahnih Aizawl FC leh Chanmari FC ten point sarih ve ve an hmu a, table chungah an awm.