Fulham lakah Chelsea an chak

Joao Pedro leh Enzo Fernandez te goal hmangin Chelsea chuan Fulham 2-0 in an hneh. Enzo Maresca enkawl Blues hian Premier League match thum an khelh aṭanga point sarih hmuin an la tlawm lo.

London Derby a nih avangin a boruak a sang. Stamford Bridge-ah Fulham lamah goal khung hmasa zawkah an inngai, Joshua King chuanTosin Adarabioyo a vir khum hnuah goal ṭha tak a khung.

Mahse, video assistant referee (VAR) hmanga ennawn a ni a, goal luh theihna kawngah hian Rodrigo Muniz chuan Trevoh Chalobah ti tluin a ke a rahsak a, hei vang hian Fulham goal khung hi hnawlsak a ni.

Chawlhlawk hma chiahin Chelsea lam an chefuh, captain armband hrengtu Fernandez-a corner chhuih chu Joao Pedro chuan a lo tauh lut - Blues a zawm hnuah inkhel pangaah bul a ṭan a, goal nga a khung tawh.

Second half tir lamah Ryan Sessegnon chuan handball vangin penalty a chawi a, a pet tura pen chhuak Fernandez tan buaina tur a awm lo - Argentine midfielder hian chiang taka khungin an chak a nemnghet.

Lawm leh lawm lo

Fulham an hneh avangin Chelsea an lawm a, forward Alejandro Garnacho an lak fel avangin an lawm bawk - Manchester United aṭanga an lakluh hian Inrinni zan khan Blues inkhel a en a, nimin khan an tlangzarh bawk.

Lawmna karah lawm lo an awm, striker Nicolas Jackson chuan Bayern Munich pan thei turah a inngai a, mahse a theih leh dawn ta lo. BBC ziah dan chuan, a chhuah theih dawn loh avangin Jackson hi a lawm lo hle.

Kum 24 mi Jackson hian Bavarians chu loan hmangin a zawm hman teuh hle, mahse striker Liam Delap a inhliam leh a, a malpui hliam vangin hun rei tak a chawlh a ngai dawn - Delap a inhliam vangin Blues chuan Jackson hi an chhuah phal leh ta lo a ni.

Christopher Nkunku erawhin AC Milan chu pound maktaduai 36-in a zawm fel hman thung.