Alexander Zverev a tla leh ta!

Grand Slam champion nih a duh a, a tum bawk - theihtawp chhuah ṭhin mah se Alexander Zverev tan kawng hawn a la a ni rih lo. US Open khelh laiah third round paltlang zo loin a zinkawng a tawp leh ta a ni.

Nimin zing khan New York khawpuia tennis stadium hmingthang pakhat Louis Armstrong Stadium-ah Zverev hi a inlan a, seeded pathumna a nih phak avangin chak tura rinkai pawh a ni, mahse Felix Auger-Aliassime lakah 4-6, 7-6(7), 6-4, 6-4 in a chak lo.

Kum 25 mi Auger-Aliassime tan mellung pawimawh a ni thung, Grand Slam huangah world number 5 chin tun hmain vawi sarih a hmachhawn tawh, a la chak ngai lo. A sulhnu ṭha lo tak hi tunah chuan a thai bo ta a ni.

Huaisen vang

Canadian tlangval Auger-Aliassime hi seeded 25-na a ni a, an ranking chhuat chuan Zverev lakah a hniam fal hle. Mahse, a tir aṭangin na takin a khingpui a nawr ngam, a tawpah chuan a huaisen rah a seng.

Auger-Aliassime chuan, "Hetianga hnehna chang tur hian ka inbuatsaih, ka khelh dan kha duhthusam vek chu ni lo mah se a ṭha thawkhat hle chuan ka hria, vanneih vang chauh chu a ni ngawt bik lo, theihtawp ka chhuah a ni.

"Tunah hian ka hna ka hlenchhuak tihna erawh a la ni bik lo, tournament khel lai kan nih avangin hmabak ka la ngah. Player ṭha hneh tura rei tak ka nghah chu a tak ram a thleng a, hei erawh chhinchhiah tlak a ni," tiin a sawi.

Auger-Aliassime hian a match lehpekah chuan Andrey Rublev a hmachhawn dawn - Russian tlangval Rublev hian inkhel dangah Coleman Wong chu 2-6, 6-4, 6-3, 4-6, 6-3 in a lo hneh ve bawk, inkhel inhnehtawk takah a vannei zawk a ni.

Nghah a la ngai

Player chhuak thar ṭha leh beisei awm tia sawi ṭhin a ni a, Grand Slam hnuaia inelna langsar ATP Finals leh Masters 1000 huangah te a champion tawh - Olympic gold medal meuh pawh a vaw chhuak tawh.

Mahse, tennis inelna ngaihhlut ber Grand Slam huangah erawh a la hlawhtling thei lo - Austrlian Open, French Open leh US Open-ah te hian final a khel vek tawh a, a vanduai zawkah a la ṭang zel thung a ni.

Wimbledon 2025-ah khan hneh nei loin a tla a, a taksa leh rilru pawh a nghawng. Rafael Nadal-a academy awmna Majorca, Spain-ah a zin a, hetah hian tennis coach lar Toni Nadal pawh a kawm, thurawn tam tak a la.

Nadal pawhin a lo fuih a, player ṭha bik Carlos Alcaraz, Jannik Sinner leh Novak Djokovic te elphak tur a nih thu pawh a sawi, mahse tunah chuan Auger-Aliassime hneh loin a tla leh pawh, major title la tur chuan season thar a nghah leh rih a ngai.

Sinner a chak

Champion lai Jannik Sinner tan hna a awlsam vek bik lo - Italian tlangval hian Denis Shapovalov lakah set a hloh hmasa a, mahse a hnuhnung pathum la zawnin 5-7, 6-4, 6-3, 6-3 in a chak a, last 16 a inhlangkai ta a ni.

Kum 24 mi Sinner hian season kal laiah Australian Open leh Wimbledon title a la thei a, tun ṭumah hian a champion leh thei a nih chuan atan kum duhawm leh ṭha bik a ni ang; French Open-ah pawh final a lut a, a vanduai zawkah a ṭang thung.

World number 1 Sinner chuan, "Tun hmain Denis Shapovalov nen hian kan lo intawng tawh, tun ṭumah pawh a hautak khawp mai," a ti. Australian Open 2021 khan Sinner hian Shapovalov hi a ngam lo, tunah erawh thawnthu a danglam ta a ni.

Inkhel dangah Alexander Bublik chuan Ben Shelton a hneh, player pahnih ten set hnih ve ve an lak hnuin Shelton hi hliam vangin a inkhel zui thei ta lo - Bublik hian a match lehpekah chuan Sinner a hmachhawn dawn a ni.