Newcastle player man to ber Woltemade

Champions League khel tur Newcastle United chuan an mamawh chhanna an nei thei ta - hun rei tak striker an zawn hnuah, VfB Stuttgart striker Nick Woltemade chu an club player man to ber ni turin an la lut.

Ft 6 leh inch 6 ngawta sang striker manah hian pound maktaduai 69 an theh chhuak a, kum thum liam taa £63mtd ngawta Alexander Isak an lakluhna man zat chu a rawn khum.

Kum 23 mi striker hian kum ruk chhung atan contract a ziak a, number 27 a ha ang. Germany international striker chuan, "He club ṭha tak ka zawm thei hi ka lawm hle. Min rawn dawr ṭantirh aṭang khan min duh ve tak tak niin ka hria a, hmachhawp pawh an nei hrawl hle.

"Germany chhuahsan tura thutlukna siam a harsa hle a, mahse, he club-a mi zawng zawngte hian lawm takin min lo lawm a, ka chhungte ang mai an ni der tawh. Head coach nen kan inbiak aṭang khan St. James' Park hi ka pan ngei tur niin ka hria a ni," a ti.

Woltemade chuan goal khung a tum tur thu sawiin, "TV aṭangin he stadium hi ka lo hmelhriat tawh a, a nawm hmelin, fans thawm pawh a ṭha ṭhin hle tih ka hria. He team tana khelh a, goal khung ka châk tawh a ni," a ti a, a inringtawk hle.

Newcastle head coach Eddie Howe chuan, "Nick kan la lut thei hi kan lawm hle a, kan duh ang tak a ni. Kil tinah ṭhatna a nei a, technical tak pawhin a sang hle. Europe-a league sang ber pawlah a theihna a pho chhuak tawh a, chutihrual chuan a kum zat en ila, hmasawnna tur pawh tam tak a la nei," a ti.

Woltemade hi striker pasang tak ni mah se, ball thiam tak a ni a, hei vang hian Bayern Munich goalkeeper Manuel Neuer chuan, 'Woltemessi' tiin a lo ko fiam hial tawh.

German striker hi Werder Bremen aṭanga inzir chhuak niin, season hmasa khan VfB Stuttgart a zawm a, inelna hrang hrangah match 33 khelin, goal 17 ngawt a khung a, assist vawi thum a nei.

Tun season-ah match thum khel tawhin, goal khat a khung leh der tawh bawk a, striker mamawh Newcastle fan-ten a khel hmuh an châk tawh khawp ang - Magpies hian Inrinni zan khan Leeds United chu 0-0 in an inhnehtawkpui.

Season hmasaa League Cup champion puitu Alexander Isak a nuar mek a, Woltemade an neih takah chuan Swede striker Isak hi amah duhtu Liverpool lamah an kaltir mai a rinawm ta.