Last 16-ah Swiatek a lut

Iga Swiatek chuan season chawhnu lam a hmang fuh chhunzawm zel - Polish star hian nimim zing khan Anna Kalinskaya chu 7-6(2), 6-4 a hnehin US Open khelh laiah last 16 a inhlangkai.

Arthur Ashe Stadium-ah Swiatek hian bul a ṭan fuh tawk lo, set hmasa zawkah hian 5-1 in a hnufual hman. Nikum khan Dubai-ah Swiatek hian Kalinskaya hi a hneh lo a, a chak lo zawkah a ṭang leh mai dawn ni pawhin a lang hman.

Mahse, player ṭha bik a nihna lantirin tie break a hruai thleng a, set hnuhnung zawkah chuan harsatna lian tham a tawk tawh lo; seeded pahnihna hian quarterfinal lut tur chuan Ekaterina Alexandrova a paltlang leh a ngai dawn a ni.

Grand Slam vawi ruk champion tawh Swiatek chuan, "Anna khan a khel ṭha hle, mahse ka vanneih a kaltluang laklawh a ni," a ti. Wimbledon aṭanga chhiar khan a zawnin match 17 a chak mek, champion turin kawng dik a zawh.