Real an chak - chak dan thiam lo Atletico!

Inrinni zan La Liga inkhelah Madrid khaw club pahnih an inlan a, inkhel hmasa zawk Atletico Madrid an chak zawh loh laiin, Real Madrid erawh a zawna a vawi thum nan an chak thung.

Atletico Madrid hian khualmualah Alaves chu 1-1 in an inhnehtawkpui a, Giuliano Simeone hmanga goal hmahruai an khung chu Alaves hian Carlos Vicente hmangin an chhanglet.

Real-in Atletico chak zawh loh thu hre sain Real Mallorca an mikhual a, mikhual team hian Vedat Muriqi hmangin khung hmasa mah se, team ṭha zawk Real an tho chhuak.

Xabi Alonso enkawl team tan Arda Guler leh Vinicius Junior ten goal khat ve ve an khung a, hun tawp thlenga goal dang lut a awm tawh loh avangin Real an chak - nizan khan Barcelona an inlan a, an result kan hre hman lo.

Atletico an zuai

Diego Simeone-a'n Alaves an lenchilh hmain hma an sawn thu a sawi a, "Result la awm rih lo mah se, hma kan sawn tih a lang," a ti - he thu a sawi lai hian an league match hmasa pahnihah an chak zo lo.

Mahse, he thu a sawi hnua an match hmasa berah pawh Atletico an chak zo chuang lo a, Real leh Barca inumna karah an tel ve lo mai ang tih a hlauhawm ṭan der tawh. Atletico hian Simeone hmangin minute sarihna lekah goal hmahruai an khung a, an hlim chhung a rei lo thung!

Minute sarih hnuah penalty an chawi zui ve leh a, Alaves tan Carlos Vicente chuan goal-ah a chantir. Madrid khaw club-in chak ngei tumin an nawr a, mahse, an vanneih zan a nih loh bakah Alaves keeper Antonio Sivera chet ṭhat zan an tawng.

Sivera hian Alexander Sorloth, Julián Álvarez, Marcos Llorente leh Giacomo Raspadori te chance neih a dansak a, Antoine Griezmann chuan uiawm takin post a tihper bawk - Atletico an chak zo lo a, match thum aṭangin point hnih chiah an la nei.

Real tan Vini

Vinícius Júnior leh Trent Alexander-Arnold ten Real Oviedo laka bul an ṭan loh hnuin, Mallorca lakah bul an ṭan ve leh ta a, player pahnih hian Real tana khelh phu an nihzia pholangin an khel ṭha hle.

Oviedo laka goal khungtu Vini-a'n goal khung a la thiam reng tih pholangin a khung leh ta a, 2-1 in an chak. Goal khung hmasatu erawh Mallorca an ni a, mikhual team tan Vedat Muriqi chuan minute 18-naah a khung.

Santiago Bernabeu-ah Real fans an reh ṭhiap a, mahse, an reh rei lo. Minute 37-naah Arda Guler chuan Xabi Alonso hnuaia player pawimawh a nihna chu goal hmangin a nemnghet a, minute khat hnu lawkah Vinícius Junior chuan a khung belh bawk.

Alonso chuan, "Vinicius hian a khel ṭha takzet. Osasuna laka a khelh dan aiin a khel ṭha zawk a, a goal khung kha kan chakna a ni bawk. Vini-a'n goal pawimawh tak a khung a, a khelh danin min tilawm hle," a ti.

Hello Arnold

Oviedo lakah Arnold chu bench aṭangin luhtir a ni a, Dani Carvajal a dam tawh avangin bench lamah a awm zui dawna sawi a ni bawk - a hnu lawkah English right back hi Thomas Tuchel chuan tun international break atana England squad-ah a ko lo.

Mahse, Alonso-a'n Liverpool academy chhuak, ball pet thiam bik hi bench-a dah reng chi a ni lo tih hriain bul a ṭantir a, a khel ṭha thlawt - Tuchel, i lo en em?

Arnold hian Kylian Mbappe tan Mallorca tlarhnung chu a ball pek hmanga ṭhiatin, mawi zetin a siamsak a, mahse, offside vangin French striker goal khung hi pawm a ni lo.

Mbappe hi a vanneih zan a ni lo - offside vangin a goal khung pahnih chu pawm a ni lo a, Guler pawhin a goal hnihna a khungah inngai mah se, video assistant referee (VAR) inrawlh hnuah pawmsak a ni lo a, Real vanneih zan ni se, goal tam zawk khung thei an ni.