A tawpah Napoli an vannei

Serie A champion lai Napoli chuan hun tawp dawna midfielder Andre-Frank Zambo Anguissa goal khung hmangin Cagliari chu 1-0 in an hneh a, season thar league match vawi hnih an khelh aṭangin point ruk an hmu.

Inrinni zan inkhelah Naples club hian ball chang tamin hun ṭha insiam hnem mah se goal hmaah an vannei tawk lo, point khatah an lungawi a ngai dawn ni pawhin a lang hman.

Mahse, Zambo Anguissa hian Stanislav Lobotka siamsak chu tawih zet maiin a khung, goal a luh meuh chuan minute 90+5 a ni tawh, point hnih hloh ṭhen tura inngai hman tawh khan point thum an hlawh chhuak leh ta zawk.

Napoli manager Antonio Conte-a'n an goal khung a lawm dan chuan Naples club lawmzia a lantir a, match awlsam a ni lo tih a hriat theih bawk. Stadio Diego Armando Maradona-a inkhel entute thawm a ṭha hem hem hle.

Conte chuan, "Cagliari kha mimala innghat an ni lo a, an zavai mai khan pumkhat ang ṭhap an ni. Khawi laiah mai pawh khan an ṭangrual ṭha em em vek a, khatiang team nghet tum kha chu a harsa takzet.

"A nihna takah chuan kan vanduai ṭum chu ni se la chak lo zawk thei pawh kan ni, hun tawp dawnah kha chuan 0-0 a ni pawh kha ka lungawi tawh. A tawp hma chiaha goal khung kha chu a hlu zual bik," a ti.

Italian coach Conte hi lawm avangin a zuang a, khelmual chhungah a tlan luh zuai bakah mipui lamah a tlan phei bawk a, inkhel boruak sang leh hlu bik tak a ni tih a lang, point thumah a lungawi hle.

Napoli hian an match hmasa zawkah Sassuolo an lo hneh tawh bawk - Serie A season thar match hnih khel tawh ho zingah Cremonese leh AS Roma te an chak ve ve bawk a, nizan khan Inter Milan leh Juventus an inlan ve bawk a, nomawi inchuha inum an tam dawn niin a lang.