Ten Hag-a'n chak hmel la hmu lo

Bayer Leverkusen-in Erik Ten Hag an lalut a, Dutch manager hnuaiah Bundesliga-ah chak hmel an la hmu lo. Ten Hag-a hote hian match hmasa berah Hoffenheim 2-1 in an hneh lo a, Inrinni khan Werder Bremen lakah 3-1 in hma hruai mah se an chak zo lo a, 3-3 in inkhel a tawp.

Weserstadion-a inkhelah Leverkusen-in bul an ṭan ṭha a, minute ngana lekah Patrick Schick-a'n goal a khung hnuah Malik Tillman-a'n a khung belh. First half tawp hmain mualneitu Werder Bremen-in Romano Schmid penalty hmangin siphurh sut ṭhen mah se Leverkusen striker Schick-a'n minute 64-naah penalty a khung a, penalty chawitu Niklas Stark hnawhchhuah a ni.

Leverkusen-in 3-1 a hma an hruai bakah an khingpui Bremen-in player 10-in an khel a, chak ngei tura ngaih an ni. Mahse, Isaac Schmidt-a'n minute 76-naah siphurh a sut ṭhen a, Leverkusen tlarhnung a pawp a, goalkeeper Mark Flekken a chesual bawk.

Injury time-ah Bremen-in Leverkusen an nawr tawm a, substitute Leonardo Bittencourt-a'n box chhungah ball vawrh lutin Skelly Alvero-a'n crossbar a tauh per a, hemi per hi Abdoul Karim Coulibaly-a'n a khung. Inkhelh banah Ten Hag chuan, "First half kan thunun a, ṭul loin goal kan chhuah. Inkhel tawp dan kha kan beisei ang a ni lo a, khatiang tur kan ni lo. Insiamṭhat kan mamawh a ni," tiin a sawi.