Man City legend Bell a thi

Manchester City legend Colin Bell chu kum 74 mi niin Thawhlehni khan a thi. City defender hlui Micah Richards chuan, "Engtik lai pawhin Manchester City lalpa a ni reng ang," tiin club legend a thlah.

Bell hi February 26, 1946 khan Hesleden, England-ah piang a, Bury tana bul a ṭan hnuah kum 1966 khan Manchester City a zawm a, hetah hian hming a chher hle. England international hlui hian Man City hi kum 1966 khan Second Division-ah champion puiin kum 1968 khan hetih laia league sang ber First Division-ah a champion pui.

Man City hian Bell-a ho hian League Cup vawi hnih bakah FA Cup leh European Cup Winners Cup nomawi vawi khat ve ve an champion bawk. Bell hi midfielder a ni a, England tan pawh vawi 48 inlanin goal kua a khung.

City captain hlui Vincent Kompany chuan, "Bell hi chu midang chunga leng a ni a, a inkhelh lai hmuh ka châk hle. Pa fel leh inngaitlawm ta  ni," tiin a thlah a,  David Silva, Yaya Toure, Sergio Aguero leh Kevin de Bruyne te pawhin City legend thlahna thu hi an ziak ve bawk.