Test ranking-ah Kiwis pakhatna

New Zealand chuan Pakistan mikhualin Test match vawi hnih an khel a, 2-0 in series an la. Hagley Oval, Christchurch-ah Test match vawi hnihna hi khelh a ni a, Kiwis hian innings khat leh run 176 in hnehna an chang.

Captain Kane Williamson chuan hnehna an chan theih nan run 238 zet a vawk chhuak a, Henry Nicholls (157) leh Daryl Mitchell (102*) ten century an siam ve bawk. New Zealand hian run 659/6 ah an duh tawk a, Pakistan hian 297 leh 186 chauh an siam thei a ni.

New Zealand hian Test match ruk a zawnin hnehna an chang tawh a, March 2017 aṭang khan an mualah Test match-ah hneh loh an la nei lo. An record ṭha tak avang hian Kiwis hi a vawi khat nan Test ranking-ah pakhatna an ni a, captain Williamson hi Test batsman ranking-ah pakhatna a ni bawk.