Ramsanga'n silver medal hlawh chhuak

BWF Ranking Tournament ngaihhlut hlawh, India Junior International Grand Prix 2025 neih zawh takah C. Lalramsanga'n medal a hlawh chhuak ve leh ta a, mixed doubles category-ah silver medal a dawng.

August 26-31, chhung khan Pune-ah inelna hi neih niin, Ramsanga hi Taarini Suri nen an inkawp a, seeded no. 2 an ni phak hial a, beisei ang ngeiin an che ṭha hle.

Ramsanga leh Taarini hian an match hmasa berah Malaysia player ṭha, Ahmad Redzuan leh Teh Si Yan-te inkawp chu 17-21, 21-15, 21-17 in an hneh nghal a, match hnihnaah Indian pair, Bjorn Jaison leh Aanya Bisht-te ṭang dun chu 21-19, 21-13 a hnehin, quarterfinal an lut zui.

Quarterfinal-ah hian Thailand aṭanga lo kal, Tachin Wiriyachairerk leh Sarisa Janeng te chu hmachhawnin, inkhel hmuhnawm takah 21-18, 21-17 in an chak.

Semifinal-ah pawh ram dang mi tho, Japan player ṭha leh tournament seeded no. 3 ni bawk, Shuji Sawada leh Aoi Banno-te inkawp an hmachhawn leh a, 19-21, 21-12, 21-13 a chakin, final an lut.

Mahse, final-ah erawh Ramsanga te ṭhiandun an vanduai a, Indian shuttler inkawp, Vansh Dev leh Shravani Walekar-te chu 21-12, 21-13 in uiawm takin an ngam lo a, silver medal-ah lungawi an zir.

Ramsanga hian kar hmasa khan Kotak Junior International Series-ah men's doubles category-ah silver medal a lo vaw chhuak tawh a, a aia ropui leh inelna hautak zawkah silver medal bawk a hlawh leh ta.

Durtlang rawlthar hi Mizoram tan a feh chhuak zui dawn a, Agartala, Tripura-a neih tur, North East Inter-State Badminton Championship 2025-ah a inlan zui ang a, October thlaa neih tur, BWF World Junior Championship 2025-ah India tan a inlan bawk ang.

Mizoram Badminton Association (MBA) chuan thuchhuah siamin, "BWF tournament ngaihhlut hlawh leh ranking point nei sanga Ramsanga'n final a thleng thei hi MBA chuan a chhuangin a lawmpui hle a ni," an ti a, inelna a hmachhawn leh turah ṭha taka a khelh chhunzawm theih nan duhsakna an hlan bawk.