Leverkusen-in Ten Hag an ban

Bayern Leverkusen-in an manager Erik Ten Hag chu league match vawi hnih chauh la enkawl mah se nimin khan an ban. Leverkusen hian Ten Hag hnuaiah DFB Pokal-ah SG Sonnenhof Grossaspach chu 4-0 in an sawp a, league-ah erawh Hoffenheim 2-1 a an hneh loh hnuin tun Inrinni khan Werder Bremen nen 3-3 in an inhnehtawk.

Weserstadion-a inkhelah hian Leverkusen hi 3-1 in hma an hruai a, mualneitu Werder Bremen player Niklas Stark hnawhchhuah a nih avangin player 10-in an khel. Leverkusen hian player 10 lakah an goal neih an hum thei lo a, 3-3 in inkhel a tawp.

Bremen laka an result avang hian Ten Hag-a ban thawm a ri ṭan a, nimin zing khan club thuneituten thutlukna siamin chhun lamah Dutch manager hi an ban thu an hrilh.

Kum 55 mi Ten Hag hian hlawhtling taka Ajax a enkawl hnuin kum 2022 khan Manchester United a zawm a, English club hi League Cup leh FA Cup-ah a champion pui. October 2024 khan Man United-in Ten Hag an ban a, kumin May thla khan Bayer Leverkusen-in an lalut a, thla thum hnu lekah German club hian an manager hi an ban nghal.