Verstappen hmaah Piastri a thleng

Formula 1 championship hmahruaitu Oscar Piastri chuan kawng dik a zawh zel - Pathianni zana tlan zawh tak Dutch Grand Prix-ah a chak ber a, tualchhung tlangval Max Verstappen hmaah a thleng.

Circuit Zandvoort-a intlansiakah, a hmasa ber aṭangin Piastri hi a tlan chhuak a, harsatna lian tham lutuk a tawk lo. McLaren driver pakhat zawk Lando Norris erawh a tlan tluan ve thei ta lo.

Australian driver Oscar Piastri hian amah hnaih bertu Norris lakah point 34 ngawtin hma a hruai fal ta a, champion turin a dinhmun a siam ṭha zel. Chutihrualin, intlansiak vawi khat chetsual a la pawi thei hle thung.

Season kal laia vawi ruk hnehna chang tawh Piastri chuan, "A tir aṭangin intlansiak ka thunun thei a, hatsatna tenau deuh chu thleng mah se a hmasa berah ka thleng a, ka tan chuan hun ṭha a ni. Chutihrualin, ka teammate a tlan fuh lo erawh a pawi ka ti.

"Thla 12 liam taa kan hun hman dan ka ngaihtuah let a, kan hmasawnna hi a nasa hle. Tunah chuan team ṭha leh hlauhawm berte zinga mi kan ni a, tun aia ṭha zawk pawhin kan la tlan thei ngei ang," a ti.

Red Bull driver Verstappen tan nomawi humhim a harsa tawh dawn, a zawna vawi li champion a nih hnuah midang hnungah a awm ve rih dawn niin a lang, beisei bo la ni lo mah se kawng a zim tawh takzet.

Ferrari driver Lewis Hamilton pawh a tlan tluan thei lo, world champion vawi sarih ni tawh Hamilton hian car sen a khalh hnuah chak ni hmel a la hmu thei lo - Michael Schumacher nen record inṭawm an neih chu a kalsan thei dawn bik lo niin a lang.