Quarterfinal-ah Sabalenka a lut

US Open hmeichhe champion lai Aryna Sabalenka chuan quarterfinal a inhlangkai - Sabalenka hian nimin zing khan Cristina Bucsa chu 6-1, 6-4 a sawp chungin a thiam zual pariat zingah a tel a ni.

Louis Armstrong Stadium-a inkhelah, world number 1 Sabalenka hian a tir aṭanga a tawp thlengin harsatna a tawk lo, hun pawimawh laiah zel a khingpui service a chhuhsak thei a, nuamsa takin hnehna a chang.

Belarus nula Sabalenka tan season ṭha pangngai tak ni mah se a vanduai ve fo - Australian Open leh French Open final kha lut mah se a chak lo zawkah a ṭang ve ve, tunah hun ṭha a beisei leh mek.

Seeded pakhatna Sabalenka chuan, "Set hloh loa hnehna chan theih hi chu duhthusam a ni, set hnuhnung zawkah erawh kha chuan awlsam taka tlang mai theih kha a ni bik lo," a ti, a match lehpekah chuan Marketa Vondrousova a hmachhawn leh dawn a ni.

Serena Williams chuan kum 2012-14 chhung khan US Open nomawi hi a zawnin a lo chawi tawh, a hnu lamah a kum zawna champion leh thei an la awm ngai lo - Sabalenka hian Serena hnung zui turin vawi thum chak a la hmabak.