Barcelona an chak zo lo

La Liga champion Barcelona chuan Lamine Yamal-a goal khung an hum tluan thei lo a, an mikhualna ramah Rayo Vallecano nen 1-1 in an inhnehtawk a, point khatah an lungawi a ṭul.

Hansi Flick-a enkawl Barcelona hian rawlthar Lamine Yamal hmangin goal an khung hmasa, minute 40-naah defender Pep Chavarria chuan a tihtluk avangin penalty a chawi a, ama hlawhchhuah hi Yamal-a'n a khung.

Thil thleng hi video assistant referee (VAR) hmanga ennawn tura tih a ni a, mahse khawl lam fel lohna avangin an ennawn thei lo a, hei hian inkhelh banah sawi zui a hlawh deuh a, penalty chungchangah erawh thutlukna pangngai chu an kaltlang pui a ni.

Marcus Rashford chu Barcelona tan a vawi thum nan a inlan a, minute 62-naah Raphinha a thlak. Manchester United aṭanga loan hmanga an hawh hian danglamna a la siam thei rih lo.

Rayo lamin minute 67-naah substitute Fran Perez hmangin si phurh an sut ta zawk a, goal dang lut tawh loin point an insem - Catalan club hi Real Madrid, Athletic Bilbao leh Villarreal te hnuaiah an awm a ngai ta rih a ni.

Barca coach Hansi Flick chuan, "Kan che rang tawk lo a, ball kan hloh nasa bawk. Kan khungpuite goal bul hnaiah tihsual kan ngah a, chumi hmang chuan min vaw let leh ṭhin, harsa vak loa siamṭhat mai theih tur tam tak kan nei niin ka hria.

"Hmasawnna tur lai kan la ngah a, kan hlenchhuah theih ngei pawh ka ring. Kan chak zawh loh danah hian chhuanlam siam a remchang lo, keimahni bawk hian kan ṭhat tawk lohna lai chu kan hria," a ti a, tlarhma lam an hriam zual a ngai tih a sawi.

Season hmasa khan Barcelona hi Real Madrid chungah pawhin La Liga nomawi an la - Real Madrid hian coach thar Xabi Alonso an nei a, match thum an khelh chinah an chak fai vek, league champion nih tuma inum boruak a sang dawn.