West Ham-in chak hmel an hmu ta

Graham Potter-a kaihhruai West Ham chuan Pathianni zan khan City Ground an luhchhuah a, mualneitu Nottingham Forest chu 3-0 in an sawp. Hammers tan Jarrod Bowen, Lucas Paqueta leh Callum Wilson ten goal an khung a, goal thum hi minute 80 hnu veka lut a ni.

Season liam taa che ṭha Forest-in match hmasa berah Brentford 3-1 in an sawp mah se Crystal Palace nen 1-1 in an inhnehtawk a, West Ham lakah an chak lo. Forest hi manager Nuno Espirito Santo leh club neitu Evangelos Marinakis inkar a ṭha tawk lo a, international break laiin an inkawm ang.

Hammers manager Potter tan erawh result lawmawm bik a ni a, Sunderland (3-0) leh Chelsea (5-1) laka chiang taka an tlawm hnuah Wolves hneh loin League Cup aṭangin an tla. City Ground-ah Forest hneh lo se, Potter hi ban theih dinhmunah a ding hial. English manager hmaa West Ham enkawltu Julen Lopetegui khan league match 20 aṭangin point 23 a hmu a, Potter hian match 21 aṭangin 23 tho a hmu.

Amaherawhchu, international break hmain West Ham-in Forest an hneh a, league chawlh laiin Potter leh a hoten an inkhelh leh tur atan inbuatsaihna an nei thei ang. Hammers hian September 13, Inrinni zanah Tottenham an hmachhawn dawn a, hmabak erawh a harsa dawn hle.