Sangliana a chak ber
Lalsangliana chuan PB Lalnienga hnehin Mizo palian inchai champion kawnghren a a hreng chhunzawm zel.
Nimin khan Lammualah Mizoram Wrestling Association buatsaihin Mizo Inchai (Title fight 2016) neih a ni a, Upper Republic tlangval Sangliana hian round riatnaah technical knock out hmangin hnehna a chang.
Title fight an neih hma hia Sangliana hian 'Ka bawhbet a nih loh pawhin ka chawi kang ang' tiin a lo sawi lawk tawh a, a thu sawi ang takin a khingpui Lalnienga hi hneh takin a chawi kang a ni.
Lalsangliana hian kum 2009 khan Mizo inchai hi a luhchilh a, kum 2014 khan palian champion lai Salem Veng tlangval Lalnun-fela hnehin a vawi khat nan a lo champion tawh a, amah chotu a hmuh leh hmasak berah a chak nawn.
Mizoram Excise department-a thawklai Sangliana hian weightlifting lamah pawh sulhnu ṭha a lo nei tawh. Kumin July-a neih 9th Mizoram Powerlifting Championship-ah pawh khan squat (265 kg), benchpress (176 kg) leh deadlift (245kg) chawiin 105kg category-ah Mizoram champion a lo ni tawh a, a rit chawite hi Mizoram record vek a ni.
Mizoram Wrestling Asso-ciation hnuaiah Mizo Palian in-chai-ah hian champion hmasa ber chu Lalkulha niin Vanlalduata chu hneh loh nei loa chawl awm chhun a ni.
nni pahnih bakah hian Tlangsiama, Lalchungnunga, Sai-dingliana, Dominic Lalrem-siama, LR Bawl-liana, Lalhmingmawia, Lalnunfela leh Lalsangliana te chu he dinhmun luah thei an ni.
Saitual tlangval PB Lalnienga hi a vanduai thei hle a, LR Bawlliana leh Kolasib tlangval Lalhmingmawia lakah a chak lo zawkah a lo ṭang tawh bawk.
Champion thar
Palaihawl inelnaah champion lai Zodinsanga a dam loh avangin R. Lalrinawma leh Lalmalsawma ten champion nih an inchuh a, Rinawma'n hnehna a chang. East Lungdar chhunvawr hian tun hma lamin state level-ah gold 15, silver pali leh bronze medal pakhat lo la tawh bawk.
Lalrinawma hian kum 2009 aṭang khan wrestling a khel ṭan a, kum 2011 aṭang khan Mizo inbuan bik hi luhchilhin Serchhip leh Tuichangral palian champion pawh a lo ni tawh. National level-ah medal la nei lo mah se kum 2010 North East Games-ah khan gold medal a lo la tawh.
Chhana a vul nawn
Pumraw intiat leh thahrui nei ṭha pahnih pate title fight-ah Lalchhanhima chuan amah chotu Lalawmpuia lakah a champion kawrhren a humhim. Saitual tlangval Chhanhima hian round sarihnaah 39 Assam Rifles ṭanglai Chhana hian bawhbetin full point a hmu a, round dang zawngah chuan an intluk tawk hle.
Lalchhanhima hian tun hma lamin sate level-ah gold24 a lo lak tawh bakah kum 2007 khan minute khat chhunga push up vawi 95 tiin Mizoram record a lo siam tawh bawk a ni.
Hmeichhia
Nulain champion lai Khaw-hai nula Lalvenhimi chuan amah chotu Bawngkawn nula F. Lalmalsawmi lakah a champion kawnghren a humhim a, nute champion lai Vanlalbiakdiki pawh in PC Lalthungheti lakah a ṭha ber a nih zia a lantir ve bawk.