Tu nge MPL U18 final lut dawn? Dar 12:00-ah Chhinga Veng vs BVT
Flying Christabel Mizoram Premier League Under 18 semifinal hmasa zawk chu vawiin chhun dar 12:00 hian Chhinga Veng FC leh Bethlehem Vengthlang FC ten an khel dawn.
Chhinga Veng hian hneh loh tawng loin semifinal an thleng a, an khingpui tur BVT erawhin round tawp berah semifinal ticket an nei chauh. Naktuk chhun dar 12:00 hian Chanmari West FC leh Aizawl FC ten final luh an inchuh leh bawk ang.
Hei le Chhinga Veng
Chhinga Veng senior team-in MPL-ah harsatna an tawh laiin Under 18 erawh league round-ah an chungnung hle.
MPL kaithar hian an match hnu-hnung bera Chanmari West an draw hmain match ruk an khel a, an chak vek. Chhinga Veng hian Bethelehem Vengthlang hi league-ah 3-1 in an hneh tawh a, hemi
ṭum hian F Lalnuntluanga, Laldinpuia leh Vanlalhmunsiama ten goal an khung.
Chhinga Veng manager S. Lalrin-siama chuan, "Football-ah chuan chak tur zawk hi sawi lawk theih a ni lo a, chutihrualin kim ṭhapa kan khel thei a nih chuan kan chak ngei ka ring," tiin chak turin a inringtawk hle.
League round-a hmahruaitu Chhinga Veng tan Ramhlunchhunga chu player pawimawh a ni a, Kolasib rawlthar chevel hi a en tlak khawp ang.
BVT an zam lo
Bethlehem Vengthlang Under 18 team tan senior team tan pawha inlan tawh K. Lalmalsawma chu player
ṭangkai a ni a, senior team-in Zirtawpni zanah Aizawl FC an hmachhawn dawn chung pawhin Malsawma hi an khelhtir dawn - hei hian BVT-in under 18 an ngai thutak tih a chiang hle.
BVT hian defender Mal-sawma an chhawr thei lo a nih chuan an goal khung khawl Joel Lalmuanpuia a pawimawh sawt dawn a, Joel-a hian league round-ah goal nga a khung tawh.
BVT manager Lalmuanawma Fanai chuan, "Khawtlang kan phur a, BVT ṭantu bakah player chhungte pawhin semifinal en ngei hi an tum. Kan naute game hi a mawi a, chak tumin an khel dawn a, Chhinga Veng hi kan hneh thei tih kan hria," tiin an zam bik loh thu a sawi.
Semifinal
Vawiin Inkhel Tur
12:00 PM Chhinga Veng Vs Bethlehem VT
September 18, Zirtawpni
12:00 PM Chanmari West FC Vs Aizawl FC