LA Galaxy-a Gerrard hun a tawp

Liverpool captain hlui Steven Gerrard chuan, LA Galaxy a chhuahsan tur thu a tichiang a, kum 36-a upa midfielder hian khelmual pawn leh chhung lamah sawmna tam tak a hmuh thu a sawi nghal.

Newcastle United leh Celtic nena sawi zawm Gerrard chuan, "MLS chhuahsan mah ila football ka la chawlhsan dawn lo. Ka chhungte nena hun hmang turin ka haw ang a, ka hmabakah eng chona nge phurawm ber tih ka ngaihtuah ang," tiin a inkhelh chhunzawm zel dawn nge coaching lamah a kal dawn tihah a la chian loh thu a sawi.

Kum 2015-a LA Galaxy zawmtu Gerrard hian MLS club tan match 34 khel hmanin goal nga a khung sak a, MLS Cup playoff-ah Colorado Rapids hneh loin an tla a ni. Gerrard chuan Bruce Arena enkawl team chu nomawi a chawipui theih loh vanga a inthiam loh thu sawiin a hun tawn erawh thil danglam bik a nih thu a sawi a, Arena chuan, "Khawvela footballer ropui ber pawl a ni," tia fakin 'Captain Fantastic' hi a thlah thung.

UEFA A coaching li-cence zir mek Gerrard hian Liver-pool tan kum 1998-2015 inkar khan match 710 a inlan sak a, FA Cup, League Cup, Champions League leh UEFA Cup final-a goal khung vek thei awmchhun niin MLS season chawlh laiin Liverpool-ah training a nei ṭhin a, Reds lamah hian coaching staff zinga tel turin a kir a nih pawn a mak lo ang.